Allen den, die disen brief an sechend oder ho^erend lesen, kúnd vnd vergich ich Wernher von Búttikon¹ ritter, || als ich verko^vft han den kelreho^vf ze Ko^ellikon², die vogtye, daz meiger ampt ze Ko^ellikon mit allen schůppossen || gu^etern zinsen nútzzen vnd zůgeho^erden, so darzů geho^eret, daz min lechen was von dem erwirdigen herren || dem abbte des gotzhus von sant Gallen, vnd es ze ko^vffen geben han fúr lechen Johansen Stieber seligen, der wilend schultheiss waz ze Aro^vw³, vnd sinen erben, als der ko^vffbrief⁴ wiset, den si von mir dar vmb besigelten hând, da thůn ich ze wissen mit disem brief, daz ich wolbedachtlich vnd gesundes libes vberein komen bin mit Heinrichen vnd Walthern von Hunwil⁵ gebrůdern, daz si den vorgenanten kelrho^vff, die vogtye, daz meiier ampt ze Ko^ellikon mit allen schůppossen gu^etern zinsen nútzzen vnd zůgeho^erden, so dar zůgeho^eret, vnd alles dz, das der vorgenant Johans Stieber selig von mir ko^vfft het ze Ko^ellikon vnd an sinem ko^vff brief stat, wider ko^vffen so^ellen von des vorgenanten Johans Stieber selig erben vmb als vil gůtes, es si guldin oder pfenning, als ich der vorgenant Wernher von Búttikon dar vmb enpfangen han von dem vorgenanten^a) Stieber seligen vnd mir gewert sint, als sin ko^vff brief wol wiset. O^vch sol man wissen, daz ich der vorgenant Wernher von Búttikon gelopt han vnd loben mit disem brief, daz ich schaffen sol, daz des vorgenanten Johans Stieber seligen erben den vorgenanten kelrho^vff, die vogtye, daz meiier ampt ze Ko^ellikon mit allen schůpossen gu^etern zinsen nútzzen vnd zůgeho^erden, so darzů geho^eret, vnd alles daz, daz der vorgenant Johans Stieber selig von mir geko^vfft het vnd an sinem ko^vff brief stat, wider ze ko^vffen geben sollen Heinrichen vnd Walthern von Hunwil vnd inen es vf geben vnd vertgen so^ellen vor dem erwirdigen herren dem abbte des gotzhus von sant Gallen vmb als vil gůter guldin, als ich der vorgenant von Búttikon enpfangen han von dem vorgenanten Johans Stieber seligen vnd mir gewert sind, als sin ko^vff brief wiset. O^vch sol man wissen, daz die vorgenanten Heinrich vnd Walther von Hunwil o^vch gewalt hand ze lo^esen von Bertzsman Zúricher burger ze Aro^vw⁶ drisig stuk geltes an korn vnd an habern vnd zwenzig stuffel hu^enr vnd zechen vasnacht hu^enr vmb drú hundert guldin guter vnd genemer, daz o^vch in den selben vorgenanten ko^vff geho^eret. Vnd des ze einem waren offnen vrkúnd vnd gezúgsame so han ich der vorgenant Wernher von Búttikon fúr mich vnd min erben min eigen insigel offenlich gehenket an disen brief. Der geben wart ze Aro^vw an dem nechsten fritag vor mitter vasten des jares, do man zalte von gottes gebúrte drizehen hundert jar vnd sibenzig jar vnd dar nach in dem sechten^b) jare.

Source Fulltext: Chartularium Sangallense IX, Nr. 5499, S. 170.