Wir^a) gra^vf Růdolf von Montfort¹ herr ze Veltkirch² kúndent vnd vergehent offenlich an disem brief allen den, die in an sehent || oder ho^erent lesen, dz wir mit gůter vorbetrahtung na^vh raut v´nser frúnd vnd erben ze den ziten vnd tagen, do wir es || mit dem rehten wol getůn mochtent, habint geben ze kouffent reht redlich vnd aigenlich ains sta^eten vnd ewigen || koufs den erwirdigen gaistlichen herren dem apt vnd dem couent gemainlich dez gotzhus ze sant Johans³ sant Benedicten ordens vnd allen iren na^vhkomen v´nser aigen wisen gelegen enhalb dem Rin⁴, dú wilont Hansen Ammans seligen waz, die vndern vnd die obern wisan, vnd stosset dú vnder wis obnan an Clausen Smitz wisen vnd an Rotenbergs vnd der Stainhúwel wisen, vnd dú ober wis stosset an Berli Spangolfs vnd an Frikken Kellers wisen vnd an den giessen, zů der selben wis geho^ert och dú o^vw, dú zwischent der selben wisen vnd dem giessen gelegen ist. Diß obgenanten wisan mit grund mit gra^vt mit steg mit weg mit holtz mit veld mit wunn mit waid mit allen rehten nútzzen vnd gewonhaiten vnd mit allen zů geho^erd habint wir inen vnd allen iren na^vhkomen reht redlich vnd aigenlich fúr vnbekúmbert lidig aigen ze kouffent geben ains sta^eten ewigen koufs vmb hundert pfund vnd vmb zwaintzig pfunt^b) phenning gůter Costentzer múnß, der wir gentzlich von in gewert sint na^vh v´nserm willen. Vnd sond och wir vnd all v´nser erben iro vnd aller ir nahkomen gůt vnd getrúw wern sin nah reht vmb die obgenanten wisan vnd vmb disen kouf, als vor beschaiden ist, wa^v vnd wie sú dez iemer bedurfent oder no^vtdúrftig werdent, ez sig an gaistlichem oder an weltlichem geriht, dz wir fúr v´ns vnd fúr all v´nser erben gelopt habint mit gůten trúwen a^vn all geverd. Diß koufs vnd dirr ding aller ze wârem vrkúnd vnd gantzer sta^eter sicherhait geben wir den obgenanten herren vnd dem gotzhus ze sant Johans vnd allen iren na^vhkomen disen brief besigelt fúr v´ns vnd fúr all v´nser erben mit v´nserm aigenn insigel. Vnd ist dirr brief ze Veltkirch geben an dem na^ehsten samstag na^vh sant Gerigen tag in dem ja^vr, do man zalt von Cristus gebúrt drútzehenhundert vnd sibentzig ja^vr, dar na^vh in dem sehsten ja^vr.

Source Fulltext: Chartularium Sangallense IX, Nr. 5503, S. 173-174.