Ich^a) Hainrich der Wiener burger ze Costentz kv´nd vnd vergich des offenlich mit disem brief allen, die in ansehent oder ho^erent lesen, als der || hohwirdig fúrst min gena^ediger herre byschoff Hainrich ze Costentz min bett gena^edklich erho^ert hât, da mit daz er den hof vnd die || múli ze dem Obern Sibenaich mit der erwirdigen herren des cappittels der korherren gemainlich der gestifft v´nser frôwen ze dem thům ze || Costentz willen vnd gvnst ze ainem rechten zinsaigen geben hât den erwirdigen gaistlichen frôwen der pryorinen vnd dem conuent den closterfrowen gemainlich des gotzhus ze sant Katherinen gelegen in der vorstat ze sant Gallen Bredier ordens vnd sant Augustinus regel, vnd wie daz ist, daz die selben gaistlichen frôwen dem selben minem herren byschoff Hainrich vnd sinen nachkomen von des selben zinsaigens wegen gebunden sigin ze gebent ja^erlichs je ze v´nser frowen tag der liechtmiss ain vierdung wahs in ains byschoffs kamer, wer danne byschoff ze Costentz ist, als der brief¹ wiset, den inen der selb min herre von Costentz vnd daz cappittel gemainlich ze dem thům ze Costentz darv´ber mit iren insigeln vnd och min brief² wiset, den ich inen och darv´ber mit minem insigel besigelt geben hant, won aber der selb hof vnd die múli ze dem Obern Sibenaich da her lehen gewesen ist von dem selben minem herren dem byschoff vnd sinem gotzhus, so bekenne ich wol, daz si darben mu^essint der dienstlichen recht, so inen vnd dem gotzhus von des selben lehens wegen beschehen solt, darvmb vnd dawider vnd och da fúr so hab ich die aigenschafft mins hus vnd hofraiti, daz ze Costentz an sant Pauls gassen zw´schen Nicolausen Fryen sa^eligen kynd vnd Berchtoltz Seger hus vnd hofraitinen gelegen ist, daz da hindenan stosset an der stat ringmûr, an des selben mins herren byschoff Hainrichs hand vff geben frilich vnd willeklich vnd hab daz selb hus vnd hofraiti mit aller zůgeho^erd wider von im enpfangen ze rechtem lehen, also daz ich vnd min erben vnd nachkomen es von im vnd von sinen nachkomen vnd von dem selben sinem gotzhus hinnanhin ze rechtem lehen habent sont. Mit vrkv´nd dis briefs, daran ich derselb Hainrich Wiener min insigel gehenkt hab ze ainer warhait der vorgeschriben ding. Dirre brief ist ze Costentz geben, do man von Cristes gebúrt zalt drúzehenhvndert jar, darnach in dem sehs vnd sibentzigosten jar, an des hailigen crútzes abent in ain herbst.

Source Fulltext: Chartularium Sangallense IX, Nr. 5532, S. 205-206.