Allen den, die disen brieff ansechend lesend oder ho^erend lesen, kúnd ich Eglolff von Altstetten¹ vnd vergich offenlich mit disem brieff fúr mich vnd all min erben vnd nachkomen, das ich mit wolbedachtem můt von miner redlichen not wegen den hoff genant des Langen hoff in Fryenbach² vnd den hoff vff dem Stein³, die min recht eigen waren, mit hus mit hoff mit akern mit wisen mit wasen mit zwy mit holtz mit veld mit wunn mit weid mit stok mit stein mit stegen mit wegen mit wasser mit wasser flússen vnd gengen mit allen rechten nútzen vnd gewonheiten vnd mit allem dem, so von recht ald von gewonheit zů den selben ho^efen ald dar in gehort, recht vnd redlich verkoufft vnd ze kouffen geben han den erbern wolbescheidnen Cůnrat vff dem Stein vnd Adelheiden siner elichen wirtin beden gemeinlich vnd vnuerscheidenlich vnd iren erben vmb eins vnd sechszig pfund pfenning gůter genemer Costentzer múntz, der ich gentzlich gewert bin vnd in minen offen nutz bewent habe, mit sölicher bescheidenheit vnd in dem rechten, das si vnd all ir erben vnd nachkomen frowen vnd man tochtren vnd knaben die vorgeschriben ho^eff beid von mir vnd von allen minen erben vnd nachkomen ze lehen haben vnd enpfachen sond, es sig nach tod oder nach kouff inrent den nechsten sechs wochen jeklichs besunder mit einem schilling pfenning Costentzer múntz ze erschatz, als dik so es dar zů kumpt. Weles aber das nit ta^et, das sol von allen sinen rechten sin, die si hettind ald haben soltind an den vorgeschriben ho^efen. Es ist ouch in dem selben kouff mit namen bedinget vnd beredt, das die vorgenempten Cůnrat vff dem Stein vnd Adelheit sin eliche wirtin vnd alle ir erben vnd nachkomen von den vorgeschriben ho^efen aller jerlich je ze sant Martis tag ein viertel gůtes vnd vngeuarliches schmaltzes sant Galler messes ze rechtem jerlichem zins geben vnd richten sond, vnd sond v´ns ouch denn damit vssgericht han. Ich vnd alle min erben vnd nachkomen so^ellen ouch willig lehenherren sin der vorgeschriben ho^eff, wenn es dar zů kumpt, es sig nach tod oder nach kouff, in allen den rechten ding vnd geding, als vorgeschriben stat an disem brieff. Ich han ouch gelopt mit miner trúw vnd loben mit disem brieff fúr mich vnd alle min erben, der vorgeschriben ho^eff mit aller zůgehorden vnd dis kouff es recht wer ze sin nach recht vnd ouch die vorgenanten Cůnrat vff dem Stein vnd Adelheiten sin elichen wirtin vnd ir erben dar vmb ze versprechen vnd ze verstan an allen stetten gen aller menklichem a^vn allen iren schaden, wenn wa vnd wie dik si dar vmb angesprochen geschadget oder vffgetriben werdent mit dem rechten. Vnd ist dis alles beschechen vnd vollfu^ert recht vnd redlich mit allen den worten werken vnd geta^eten vnd so nach gewonheit vnd recht darzů gehorten vnd ho^erren solten vnd notdurftig waren vnd als es wol krafft vnd macht sol vnd mag han nu vnd ouch hernach. Vnd des alles ze einem vesten waren vnd steten vrkúnde vnd gantzer sicherheit aller diser vorgeschribner dinge vnd gedinge so han ich Eglolff von Altstetten da vorgenempt fúr mich vnd fúr all min erben vnd nachkomen min eigen insigel offenlich gehenkt an disen brieff. Der geben ist ze Marpach⁴ in dem Rintal an dem nechsten zinstag vor sant Jacobs tag des heilgen zwo^elffbotten in dem jare, do man zalt von gottes geburt drútzechenhundert vnd in dem sechs vnd sybintzigosten jar.

Source Fulltext: Chartularium Sangallense IX, Nr. 5518, S. 189-190.