Allen^a) den, die disen brief ansehent oder ho^erent lesen, kúnden wir der vogte vnd der rat ze Rapreswil¹ vnd veriehen offenlich || an disem brief vmb die sto^esse vnd misshellunnge, so der erwirdig geistliche v´nser gnediger herre abte Johans dez gotz||hûs von Pfeuers² sant Benedicten orden in Curer bystům gelegen vnd herr Ru^edger von Hasel³ kilcherre ze Jonen⁴ || mit enander gehebt hatten vntz vf disen hútigen tag, als dirre brief geben ist, von etlicher zehenden vnd gu^eter wegen, als hie nach geschriben stat. Der selben sto^esz si ze beiden teilen vf v´ns kamen willeklich, also daz wir dar vmb von ietwederm teil ein kuntschaft verho^erren solten, vnd wedre denn dú bessren kuntschaft het, der solt sin geniessen vnd da bi beliben. Vnd sint dis dú gu^eter, dar vmb wir kuntschaft verho^ert haben vnd der zehende der selben gu^eter gen Busskilchen⁵ geho^ert. Des ersten von den inren Grútzen⁶, daz da der zenhende halber gen Busskilchen geho^ert vnd halber gen Jonan, vnd vmb ein aker lit ze Busskilch, den man nemt der Vade aker, dz da der selb zende gen Busskilchen geho^ert, vmb ein aker sto^vsset vf an dú vad zů dem obern túrlin, vmb zwen aker des spitals Túrli aker, vmb ein aker lit an dem Túrli aker vnd gat v´ber den weg, vnd vmb ein aker lit an dem selben aker, vmb ein aker sto^vsset an dú widmen vnd andrunt an dz túrli bi dem hag vnd vmb ein aker sto^vsset an dú Jonan⁷ vnd andrunt an dez Ha^edlers gůt vnd vmb ein aker, der vor dem Schâchen⁸ gelegen ist, was obrent den march steinen ist, dz zendot gen Busskilchen, vnd daz nidrent den march steinen zendot gen Jonan. Dis vorgenanten aker alle die zendent gen Busskilchen. Vnd vmb ein aker lit an Jonar veld⁹ bi dem bo^vme, was da ob dem selben bo^vme gelegen ist bi einer juchart einer gůten ane geuerde, dz ho^ert gen Jonan, vnd daz nidrent dem bo^vme ho^ert o^vch gen Jonan, hier vmb haben wir ein kuntschaft verho^ert. Vnd ist o^vch dez obgenanten abtz kuntschaft dú besser gesin, als si bi geswornen eiden geseit hand vnd o^vch anders nit wústen noch nie vernomen hand. Vnd sind dis die erbern lút, die dar vmb gesworn vnd geseit hant von ieklichem stuk vnd aker, als vorgeschriben stat. Dez ersten brůder Johans Banwart meister in dem spital ze Rapreswil¹⁰, Ru^edi Leman von Busskilch, Ebli Schúchter von Kempraten¹¹, Hans Svmber, Erni Svmber gebrůder, Heinr. Bleicher, Erni Loper von Jonan, der sigrist von Busskilchen, Cu^eni Swartz, Cu^eni Wenk von Jonan, Heini Amptz vnd Heini am Stein. Vnd haben o^vch das von beiden teilen bi gůten trúwen verho^ert von ieklichem stuk an daz ander, als vor geschriben stat. Vnd was obrent dem bo^vme als vor beret ist in Joner veld gelegen, der zend ho^ert gen Busskilchen an dú juchart aker, dú gen Jonan zendot. Vnd dez zů einem warem vrkúnde vnd zúgsame vnd gantzer sicherheit alles, so vor geschriben stat, so haben wir der vogt vnd der rat ze Rapreswil der selben v´nser stat insigel offenlich gehenkt an disen brief. Der geben ist an dem meijen tage in dem jar, do man zalt von gottez gebúrt drúzehenhundert vnd sechs vnd sibentzig jar.

Source Fulltext: Chartularium Sangallense IX, Nr. 5504, S. 174-175.