Allen^a) den, die disen brief ansehent lesent oder ho^erent lesen, kúnd ich Cůnrat Vogelwaider burger ze sant Gallen vnd || vergich offenlich an disem brief fúr mich vnd fúr alle min erbon von des holtzes wegen gelegen ze Wisen², das || ainhalb sto^vzzet an Wisa vnd andrunt an V^olrich Fritboltz holtz, das ich reht vnd redlich geko^vfft han vmb || Hûgen vnd Johansen die Růpreht gebrůder vmb fúnf vnd zwaintzig pfunt pfenning Costentzer múns, als der ko^vffbrief³ wol bewiset, der darúber geben ist, das ich das selb holtz ze getrúwer hant der fromen beschaidnen Bartholome Blârrers pflegers vnd Walther O^edlers maisters der armen siêchan an dem Linsibu^el⁴ ze sant Gallen handen geko^vfft han, darúber ich iro getrúwer trager bin, vnd das o^vch die selben Bartholome Blârrer vnd Walther O^edler dú êgenanten fúnf vnd zwaintzig pfunt pfenning ze der vorgenanten siêchan handen gewert vnd bezalt hant, vnd das ich noch min erben noch nieman anders von minen wegen noch an miner stat den vorbenemten pfleger vnd o^vch den obgenanten maister noch ir nachkomen noch die vorbenemten armen lút an dem Linsibúl von des vorgeschribnen holtzes wegen niemer angesprechen bekúmberron noch in kain wîse bekrenken súllent weder mit dem rehten noch âne reht noch mit kainen andren sachen âne geuerde. Vnd des ze ainem wâren vrkúnd so han ich Cůnrat Vogelwaider da vorgenant min aîgen insigel fúr mich vnd fúr alle min erben offenlich gehenkt an disen brief. Der geben ist an dem na^ehsten zinstag nach v´nser fro^vwen tag ze der liehtmisse, do man zalt von Cristus gebúrt drútzehenhundert iâr, sibentzig iâr vnd darnach in dem sibenden jâre.

Source Fulltext: Chartularium Sangallense IX, Nr. 5560, S. 233.