Wir^a) Geori von gottes gnâden abt¹ vnd der conuent gemainlich dez gotzhus ze sant Gallen, || daz ân alles mittel zv^o geho^ert dem stůl ze Rôme, tu^en kunt vnd veriehen offenlich mit disem brief || fúr vns vnd fúr alle vnser nâchkomen allen, die in sehent lesent oder ho^erent lesen, daz wir mit gůter || vorbetrahtung vnd mit ainberem willen vnd o^vch nach vnsers vorbenemten gotzhus dienstlút vnd ander erber wiser lút rât aines rehten redlichen wehsels v´berain komen sient mit den ersamen Haintzzen von Stainach² vnd fro Margarethen siner êlichen hûsfro^vwen Cůnratz sa^elgen dez vogtes von Wartense³ elichen tohter mit so^elicher beschaidenhait vnd in dem rehten, daz sv´ vnd alle iro liberben tohtren vnd knaben mit allen den lúten, die von vns vnd vnserm vorbenemten gotzhus iro lehen sint oder die iro reht aigen sint von dem libe, mit vnsern vnd vnsers vorbenemten gotzhus lúten den wehsel hant vnd haben sont vnd o^vch wir gen in, alz dik ez darzv^o kumpt, ze gelicher wise vnd in allen den rehten dinge vnd gedinge, alz zwischen vns vnd vnseren voruaren vnd vnsers vorbenemten gotzhus dienstlúten biz her vngeuarlich behalten ist. Wir habent o^vch den vorgenemten Haintzzen von Stainach vnd fro Margarethen siner êlichen hûsfro^vwen willeklich vnd frilich geben vnd gebent in mit vrkúnd diz brieues a^ellú dv´ reht, die o^vch ander vnsers vorbenemten gotzhus ze sant Gallen dienstlút hant vnd haben sont, also vnd in dem rehten, daz sv´ vns vnd vnseren nachkomen vnd vnserm vorgeschribenen gotzhus ze sant Gallen alles daz tůn sont, daz o^vch ander vnsers vorgedahten gotzhus dienstlút vns vnd dem selben vnserm gotzhus haft vnd gebunden sint ze tu^enne, ân alle geua^erde. Vnd ze vrkúnd der warhait aller diser vorgeschribenen dinge vnd vergiht so habent wir abt Geori da vorgenemt vnd der conuent gemainlich dez vorgeschribenen gotzhus ze sant Gallen vnser insigel vnd v´nsers conuentes insigel offenlich gehenkt an disen brief. Der geben ist ze sant Gallen an dem na^ehsten donstag nach dez hailigen crútzzes tag, alz ez erho^eht ward, in dem jar, do man zalt von Cristus gebúrt drúzehenhundert jâr, sibenzig jâr vnd darnach in dem sibenden jâre.

Source Fulltext: Chartularium Sangallense IX, Nr. 5610, S. 284.