Ich^a) Yttal von Stadgun¹ ritter tůn kunt vnd vergich offenlich mit disem brief fúr mich vnd min erben, won mir der || erwirdig gaistlich herr min herr der abt des erwirdigen gotzhus ze sant Gallen von sinen vnd von des vorgenanten || gotzhus genaden enpholhen hat Adelh. die Vochenzerin vnd irú kint, das ich ir vogt sol sin vnd ir schirmer von || des gotzhus wegen, die selben lút von alter des vorgenanten gotzhuses ze sant Gallen reht aygen gewesen sint vnd noch sin aigen sint mit erb mit gela^ess mit va^ellen vnd mit allen andren rehten syten vnd gewonhaiten als ander aygen lút des dikgenanten gotzhuses, das ich noch min erben noch nieman von v^ensren wegen minem^b) herren den abt noch das vorgenant gotzhus ze sant Gallen noch kainen sinen nachkomenden noch niemen von iren wegen sont irren bekúmbern noch sûmen so^ellent an kainen den rehten, so si habent ietz oder iemer gewnnen mo^ehtin zů denen vorgenanten menschen allen oder an iren dehainem noch an ir dehaines erben an ir lib vnd an ir gůt an va^ellen an gela^essen an erb noch an erbschaft noch an kainen rehten noch gewonhaiten noch an aygenschaft noch an lehenschaft an tot noch by lebtagen noch nach tot, so der vorgenant min herr der abt oder das gotzhus ze sant Gallen an inan hat oder gehan mag, vnd das wir die vorgenanten lút schirmen vnd vogten so^ellent dem vorgenanten minem herren dem abt vnd dem gotzhus vnscha^edlich ga^entzlich. Vnd des ze ainem wa^vren offen vrkúnd vnd ze sicherhait aller vorgescribner dingen vnd gedingen vnd das ich die wa^vr vnd sta^et lazz beliben von mir vnd minen erben, gib ich der vorgenant Ytel von Stadgun ritter dem vorgenanten minem herren dem abt vnd dem gotzhus ze sant Gallen disen brief offenlich besigelt mit minem aygen insigel. Der geben ist in dem jar, do man zalt von Cristus gebúrt driúzehenhundert jar, dar nach in dem sybentzgosten vnd in dem sybendenjar, an dem frytag vor sant Pauls tag, als er bekert wart.

Source Fulltext: Chartularium Sangallense IX, Nr. 5557, S. 230.