Wir^a) der burgermaister schulthaisz ra^vte vnd alle burger gemainlich rich vnd arme der stat ze No^erdlingen¹ veriehen offenlich vnd tu^egen kunt allermenglich mit || disem briefe, wan daz ist, daz dis nachbenempten des hailigen Ro^emischen richs stete Vlme, Costentz, Esselingen², Rútlingen³, Rotwile⁴, Wile⁵, V´berlingen⁶, Ma^emmingen⁷, || Bibrach⁸, Rauenspurg⁹, Lindow¹⁰, sant Gallen, Kemptun¹¹, Koufbúrren¹², Livtkirch¹³, Isny¹⁴, Wangen¹⁵ vnd Bůchorn¹⁶ got ze lobe dem hailigen Ro^emischen riche ze nvtze vnd || ze eren in selb vnd dem lande ze frid vnd ze gemach sich selb ze samen verstrikt vnd verbunden hant vnd och ainer lieblicher frivntschaft mitainander v´ber ain komen sint mit aiden, ainander getrivlich bigestendig beholffen vnd bera^vten ze sint nach dez buntbriefs sage, den och si dar vmbe ainander besiglt vnd gegeben hant, vnd doch in dem selben irem bunde vnd buntbriefe dem hailigen riche alliv siniv reht ze halten vnd ze tu^end mit namen behalten vnd vfgesetzet a^vn alle geuerde, dar vmbe vnd von so^elicher grozzer frivntschaft liebi vnd triwe, so wir zů den vorgenanten dez hailigen richs steten durch billich von dez hailigen richs wegen lang zit gehept haben vnd noch fúro in kúnftigen ziten ha^vn súln vnd wellen, so haben wir vns mit gůten fúrsa^etzen vnd wolbera^vtem sinne vnd můt durch merren nvtze frid vnd gemachs willen der vorgenanten stete vnd och vnser selbs vns zů den egenanten steten in den vorgenanten iren bunde ietzo tugentlich verstrikt vnd verbunden vnd och dar vmbe alle liplich zů got vnd zů den hailigen gesworn gelert aide mit vfgebottnen vingern, den selben iren bunde luterlich vnd a^vn alle geuerde mit in ze halten ze laisten vnd och ze vollfu^eren in allen maynungen pungten vnd artikeln, alz och der wiset vnd gemachet ist vnd alz och der buntbriefe von wort ze wort begriffen vnd verschriben stat, vngeuarlich. Mit kraft vnd vrkúnde ditz offnen briefes, den wir in dar vmbe besiglten geben mit vnser stat gemainem insigl, daz offenlich ze gagen hanget. Daz beschach vnd wart dirr brief gegeben ze No^erdlingen in vnser stat dez nehsten sunnentags vor sant Laurentzen tag, do man zalt nach gotz gebúrt drivzehenhundert jar vnd dar nach in dem siben vnd sibentzigosten jare.

Source Fulltext: Chartularium Sangallense IX, Nr. 5600, S. 272-273.