Wyr . . der Schultheis vnd . . der rat der statt ze Winterthur¹ tůn kunt vnd vergechen offenlich an disem brief, daz fúr v´ns in v´nsern rat als fúr gemaine || richter komen sint die erbern lúte vro Margretha Wernher des Windeggers von Rappretswille² eliche husfro^vwe mit demselben ir huswirte vnd ir rechten vogte vnd Johans || der Hasler ir brůder wilent Heintzen des Haslers seligen kind von Rappretswille an ainem tail vnd herr Berchtolt der Pleto phrůndherre vff dem Heiligen Berg bi Winter||thur³ gelegen an dem andern tail, vnd mit gůter vorbetrachtunge vnd nach gůtem rate veriachen do vor vns frilich vnd vmbetwungenlich die obgenanten vro Margretha die Windeggerin vnd Johans der Hasler, das sú noch ir erben noch nieman anderre von ir wegen den vorgenanten herr Berchtolt den Pleten noch des erben vnd sunderlich das gotzhus ze Rúti⁴ fúrbazzer weder sumen noch irren wo^elten an dem gůte gelegen ze Húswille⁵, daz die Anger buwent, mit aller zůgeho^erde von des geme^achtes wegen, so in derselb herr Berchtolt der Pleto vnd herr Johans der Pleto selig sin brůder vmb dasselb gůt getan hatten nach des briefs⁶ sage, der darv´ber geben ist, vnd liessen o^vch im do ze mal dasselb gůt willeklich vnd gerne ledig vnd los mit solicher bescheidenheit, daz sú noch ir erben kain ansprach dazů gehaben noch gewinnen sont weder mit geistlichen noch mit weltlichen gerichten noch mit enheinen sachen, so ieman erdenken kan oder mag, vnd won die vergicht vor v´ns beschehen ist mit aller der ehafti vnd sicherheit worten vnd werken, so nach recht oder von gewonheit deheins weges dazů gehorte vnd man tůn solte vnd da mit es nu vnd hie nach krafte haben sol, so haben wir Cůnrat von Sal der schultheis⁷, Wetzel Schultheis, Otto Zoller, Hans Saler, Růdolf Lochli, Hans Steinkelr, Berchtolt Mo^ergelli vnd Johans Lo^eninger der rat ze Wintertur v´nsers rates ingesigel offenlich gehenket ze ainer zúgnúste vnd warem vrkúnde diser sache an disen brief. Darzů vergich o^vch ich der obgenant Wernher Windegger, daz die egenant vro Margretha min eliche wirtinne allú die vorgeschoben ding mit miner hand gunst vnd gůtem willen getan hat vnd ich o^vch fúr si getro^estet han, so han ich min aigen insigel fúr si in vogtes wise vnd fúr mich selber gehenket an disen brief. Ich der vorgenant Johans Hasler vergich o^vch ainer gantzen warheit aller vorgeschobener ding, vnd wan ich aigens insigels nit enhan, so binde ich mich in diser sache vnder des egenanten Wernher Windeggers mines lieben swagers insigel. Dis beschach vnd wart diser brief geben ze Winterthur an dem nechsten dornstag vor sant Johans tag ze súngichten nach Kristi geburte drútzehenhundert vnd sibentzig jaren vnd darnach in dem sibenden jare.

Source Fulltext: Chartularium Sangallense IX, Nr. 5587, S. 259.