Wir Karl von gotes gnaden Romischer keyser zu allen zeiten merer des reichs vnd kunig ze Beheim vnd wir Wenczlaw von den selben gnaden Romischer kunig || auch zu allen zeiten merer des reichs vnd kunig ze Beheim bekennen vnd tu^en kunt offenlich an disem brief, daz wir vz allen echten gelazzen haben vnd lazzen auch vz mit craft dics || briefs die burgermeister die rete vnd die burger gemeinclichen der stete, sie seint besunder oder gemeinclichen geecht, ez seint cristen oder juden, von wem daz beschehen wer, ez sey || von vns selber oder von clage wegen des edeln Eberharts von Wirtenberg oder von wes wegen daz beschehen wer, Kostencz, Vlme, Ezlingen, Rewtelingen, Weyl, Rotweyl, Vberlingen, Memingen, Byberach, Rauensburg, Lindawe, sant Gallen, Kempten, Kaufburen, Lu^ekirchen, Isniyin, Wangen vnd Buchhorn, vnd wollen auch, waz vff die vorgeschriben stete in jors frist vff sie alle oder yglichem besunder erclagt sey, ez sey anleit acht oder eruollunge vnd nuezgewer, von vnser vnd vnsers suns wegen oder von des von Wirtenberg wegen vff den lantrichter zu Memingen vff die burgermeyster die rete vnd die burger gemeinclichen der stete zu Memingen vnd zu^e Byberach, vnd mit namen die clage und achte, die Chunrat von Rechberg² von Weschenburg³ getan hat vff die von Memingen. Wir haben auch mit namen vz der acht gelan Vtzen von Holczhein⁴, Petern vnd Vlrichen die Stameler vnd die burger gemeinclichen der stat zu^e Vlme, darein sie mit rechter clage vnd vrteyl braht het Hans Arnolt von Dinkelspuhel⁵. Wir haben auch vz der acht gelan Jeklin den Juden von Vlme, darein in erclagt het der vorgeschriben von Wirtenberg. Vnd wollen, daz den vorgeschriben echtem in allen vnd ir iglichem besunder, ez sein cristen oder juden, die selben echte, darein sie erclagt seint, vnd auch die anleit vnd eruollu^enge furbas mer an leybe vnd an gu^ete zu^e keinem schaden kumen sol vff dem lande vnd in den steten mit deheinen sachen in deheinweys. Mit vrku^ende dies briefs versigelt mit vnsers hofgerichts anhangendem insigel. Der geben ist zu^e Rotenbu^erg nach Cristu^es geburt drew^ezehenhu^endert jar vnd in dem syben vnd sybenezigstem jare, an dem su^entag nach vnsers herren leychenames tag, vnser reich in dem ein vnd dreizzigstem vnd des keysertu^ems in dem zwey vnd zweinczigstem jare vnd wir Wenczlaw^e der egenant vnser reich des Beheimischen in dem vierczehenden vnd des Romischen in dem ersten jare.

Source Fulltext: Chartularium Sangallense IX, Nr. 5584, S. 256-257.