Allen^b) den, die disen brieff ansehent lesent oder ho^erent lesen, kúnden wir Cůnrat vnd Hainrich Talakrer gebůder^c) vnd || veriehent offenlich mit disem brieff, als die erwirdigen gaistlichen v´nser gnedigen herren abt Cůno der conuent vnd || dz cappitel gemeinlich des gotzhuss ze sant Gallen¹ sant Benedicten ordens v´ns die genad getan hand, dz sú v´ns vnd || v´nsern erben dz erste lihen der kilchen ze Eriswile² geben hand vnd sú v´ns darumb die widmen vnd den kilchensatzze der selben kilchen ingegeben hand, dz wir vnd v´nser erben die selben kilchen dz erst lihen lihen sond vnd múgent mit vnd in allem rechten, wenne dz ze schulden kunt vnd die kilch ledig wirdet, als der brieff wol wiset, den sú v´ns darumb geben hand, sol man w´ssen, wenne dz ist, dz wir oder v´nser erben die obgenant kilchen ainest lihent vnd ainen kilcherren darzů fúrderrent, wenne dz zeschulden kunt, dz wir noch v´nser erben mit der obgenanten kilchen vnd kilchensatzze die fúrbass ze lihenn nút mer ze schaffen haben súllent, won dz wir vnd v´nser erben den obgenanten gnedigen herren vnd dem cappitel ze sant Gallen vnuerzogenlich den selben brieff, den wir vmb dz erste lihen hand, wider geben vnd antw´rtenn sond vnd fúrbass nach dem ersten lihen der selben kilchen sú noch ir gotzhus nút sumen sond, Vnd darumb ze einer meren sicherheit so hand wir in vnd ir gotzhus ze rechten búrgen geben vnuerschaidenlich die fromen Růdolff von Liechtenstaig³, Růdolff von Edeswile⁴ vnd V^olr. Wyrrin mit der beschaidenhait, wenne wir vnd die selben búrgen nach dem egenanten ersten lihenn gemant werdent, den vorgenanten brieff wider ze geben, so súllen wir vnd v´nser erben den vorgenanten v´nsren gnedigen herren vnd dem cappitel den selben brieff vnuerzogenlich in dem nechsten ma^vnet nach der manung wider geben, oder wir vnd och die obgenanten búrgen súllen darnach recht vnd gewonlich giselschafft leisten ze sant Gallen oder ze Wile⁵ oder ze Bischoffcelle⁶ nach der selben stetten recht vnd gewonheit als lang, vntz dz wir den vorgenanten brieff den obgenanten v´nsern gnedigen herren vnd dem cappitel wider gebent, an geuerd. Wir lobent o^vch fúr v´ns vnd alle vnser erben, die vorgenanten búrgen vnd ir erben von allem schaden ze lo^esen, in den sú von dirre búrgschafft wegen ko^vmen mo^echtind, an geuerd. Vnd des ze vrkúnd vnd steter sicherhait so hand wir v´nsrú insigel gehenket an disen brieff. Wir die obgenanten Růdolff von Liechtenstaig, Růdolff von Edeswile, V^olr. Wyrri veriehent o^vch ainer gantzen warhait alles des, so hie vor geschriben stat, vnd dz wir búrgen worden sind in aller der wise, als vor beschaiden ist. Vnd des ze vrkúnd so hand wir o^vch vnsrú ingsigel gehenket an disen brieff. Der geben ist ze Wile, do man zalt von gottes gebúrt tusent drúhundert sibentzig vnd nún jare, an sant Verenen tag der hailigen junkfrowen.

Source Fulltext: Chartularium Sangallense IX, Nr. 5735, S. 401-402.