Allen^a) den, die disen brief an sehent lesent oder ho^erent lesen, kúnd ich Johans Morgen von Vstra¹ vnd vergih des offenlich mit disem brief vmb den zehenden von der || wisen gelegen in Wiler Turôw², die man nemt Grafen Zagel, der Johanses sailigen von Sturzenegg³ redlich pfant was von dem gotzhus ze sant Gallen fúr || aht pfunt pfenning gůter Costentzer múns, den selben pfantschatz fro Gůta Kofma^ennin von dem selben irem elichen man sailigen erarbte, vnd der selb pfant||schatz mich och von erbs wegen an viel von der selben fro Gůten Kofma^enninen miner elichen frowen sailigen, daz da der erwirdig fúrst min gna^ediger herre abt Chůn⁴ des vorgedahten gotzhus den selben zehenden vnd pfantzschatz mit allen rehten nútzzen vnd mit aller zůgeho^erd von mir gar vnd gentzlich erledgot vnd erlo^eset hat mit aht pfunt pfenning gůter Costentzer múns, der ich gentzlich von im bin gewert vnd bezalt nach allem minem willen, vnd darumb so han ich mich fúr mich vnd fúr alle min erben vnd nahkomen hin in des vorgenanten abt Chůnen vnd in siner nahkomen vnd in sins vorgedahten gotzhus hand letklich vnd frilich entzigen vnd entzih och gentzlich gar vnd och reht vnd redlich mit vrkúnd dis briefs an dem vorgeschriben zehenden vnd pfantschatz mit aller zůgeho^erd alles rehten gaistlichs vnd weltlichs gerichtes aller vordrung vnd ansprach aller brief vnd vrkúnd vnd och aller der ander sach, da mit ich oder min erben oder ieman andrer von v´nsren vnd an v´nser statt die selben zehenden vnd pfantschatz mit aller zůgeho^erd nv ald hernach kúndint angesprechen in dehain wis ald weg, ân geuerd. Vnd och^b) wa^eri, daz ich oder min erben oder ieman andrer von v´nsren wegen dehain brief oder vrkúnd hettint oder hienach fundint von des selben zehenden vnd pfantschatz wegen vnd die an dehainen stetten jemer vszugen zôgtint oder fúrbuttint, die selben brief vnd vrkúnd sond gentzlich tod vnd ab sin vnd ainkain kraft noch maht niht haben vnd dem vorgenanten abt Chůnen noch sinen nâhkômen noch dem vorgeschriben gotzhus ainkainen gebresten noch irtagen niemer bringen noch pru^efen weder vff gaistlichem noch vff weltlichem gericht noch an dekainen andren stetten ân alle geuerd. Vnd dez ze ainer warhait han ich Johans Morgen da vorgenant min insigel offenlich gehenkt an disen brief. Der geben ist ze Wil⁵ in der statt an sant Margretun tag, do man zalt von gottz gebúrt drúzehenhundert jar, sibentzig jar, darnach in dem nunden jar.

Source Fulltext: Chartularium Sangallense IX, Nr. 5728, S. 396.