Ich Hainrich von Bargs¹ kúnd vnd vergich offenlich mit vrkúnd dis briefs aller menglich, daz ich reht vnd redlich || vnd min erben nach raut v´nser gůten frúnd mit williger vorbetrachtung aigenlich ze kôffen geben hân den edlen woler||bornen herren graf Hugen vnd graf Hainrichen von Werdenberg² vnd iren erben vier phunt pfenning ja^erclichs geltz gůter Co||stentzer múns ab dem zolle vnd vss dem zolle ze Rinegg³ zů ainem rechten redlichen kôff vmb fúnf vnd zwainzig phunt pfening zwen gůt haller fu^er ain phenning vnd sint der gar vnd gentzlich von in gewert nach allem v´nserm willen vnd hân innen vnd iren erben die selben vier phunt geltz geben fu^er reht ledig aigen vnd sol ich vnd min erben der egenanten herren vnd ir erben dis kofs recht gewern sin nach reht nach aigem recht an gaistlichen vnd an weltlichen gerichten vnd an allen stetten ân alle geuerd, vnd sunderlich hân ich versprochen vnd bin wer worden vnd wil och gůt wer sin fu^er die erberen^a) wolbeschaiden frowe Annan von Ho^escht⁴, die man nempt von Rinegg, vnd fu^er ir erben, dz si kain ansprâch zů dem vorgenanten kôf die vier phunt geltz niemer me gehân noch gewinen sol noch enmag, vnd entzihe mich och vnd han mich entzigen fu^er mich vnd min erben gen den egeschribnen herren vnd gen iren erben aller aigenschaft aller lehenschaft aller gewer aller kuntschaft lút vnd brief vnd aller vordrung vnd ansprach vnd aller der reht, so ich an dem egeschribner zolle ze Rinegg ie gehebt hân old ich vnd min erben iemer gewinen mo^ehtint ald ieman von v´nsren wegen. Dz dirr kôf vnd alles, daz hie verschriben stât, sta^et vnd vnuerkert belib, dez ze vrkúnd so henk ich min aigen insigel an disen brief. Der geben ist ze Rinegg dez jars, do man zalt von gotz gebúrt drúzehen hundert jar vnd nún vnd sibenzig jar, an sant Johans aubent ze súndwenden.

Source Fulltext: Chartularium Sangallense IX, Nr. 5717, S. 374-375.