Ich^a) Johans Anman vsser der Richen Ôw¹ besta^eter lúpriester der kilchen ze Wuppnow² vergih vnd tůn kunt offenlich mit disem brief, || das ich mit wolbedahtem můt wilklich vnd vnbetwungenlich das gu^etli gelegen ze Albisperg³, daz man nemt sant Peters gu^etli⁴, || daz ich durch reht von der vorgedahten kilchen wegen lihen sol, mit allen rehten nútzzen vnd mit aller zůgeho^erd verlihen han || dem fromen vnd erbern kneht Johansen Ga^ertisperger von Ga^ertisperg⁵ vmb den zins, als er daher der vorgenemten kilchen ze Wupnôw vnd och sant Peters kilchen ze Wil⁶ dauon ze zins geben vnd gericht hat aller ja^erlichs, vnd lihe och mit vrkúnd dis brief es fúr mich vnd fúr alle min nahkomen redlichen vnd reht mit der beschaidenhait vnd mit dem gedingde vnd och in solichem rehten, das er der selb Johans Ga^ertisperger das vorgeschriben gu^etli mit allen rehten nútzzen vnd mit aller zůgeho^erd getru^eweklich vnd fridlich ân alle sumsa^eli haben vnd niessen sol, alle die wile vnd er den zins, so er daher dauon geben hat, verrichteklich git vnd vsrichtet aller ja^erlichs, als er dann vellet vnd genauen sol, ân geuerd. Vnd dez ze ainer besta^eten warhait aller vorgeschribener ding, won ich dann aigens insigels nit enhan, so bin ich komen vnd gestanden fúr den wisen wolgelerten herren herr Johansen von Willberg⁷ closterheir des gotzhus ze Vischinon⁸ vnd och v´nsers cappitels tegan vnd den ernstlich gebetten, daz er ze ainer warhait der zúgnust aller vorgeschribener ding sin insigel gehenket hat an disen brief, des och ich Johans von Willberg closterheir vnd tegan da vorgenant vergih, das ich von ernstlicher bett wegen des vorgenanten herr Johanses Ammans lúpriesters ze Wuppnôw min insigel mir vnscha^edlich fúr in gehenket han an disen brief. Der geben ist ze Wil⁹ in der statt an dem na^ehsten samstag nach dem hailigen tag ze pfingsten, do man zalt von gottes gebúrt drúzehenhundert jar, sibentzig jar, darnach in dem núnden jar.

Source Fulltext: Chartularium Sangallense IX, Nr. 5714, S. 372.