Wir^a) . . die priorin vnd der . . conuent gemainlich des gotzhus ze Zofingen¹ gelegen in der stat ze Costentz Prediger ordens tůnt kunt || vnd veriehin des vffenlich^b) mit disem brief allen, die in ansehent oder ho^erent lesen, das wir alle mit gemainem willen vnd rat vnd och || ainwelleklich fúr vns vnd alle vnser nachkomen nach vnser gůten frúnd vnd ander erber lút rat den gaistlichen in got der a^epptissennen vnd || dem conuent gemainlich des gotzhus ze Maggnow² des ordens von Citel gelegen in Costentzer bistům vnd allen iren nachkomen habin ze koffent geben recht vnd redlich vnd aines iemer werenden ewigen koffes vnsern hof gelegen ze Swartzenbach³ in dem kilchspel ze Jonswil⁴, den man nemmet der frowen hof von Zofingen, den ietz Nesen V^eli buwet, mit holtz mit veld mit akker mit wisen mit zwi mit wasser mit wasserlaiti mit wunn mit waid vnd mit allen nútzzen rechten vnd gewonhaiten, so darzů ho^ert vnd als wir vnd vnser gotzhus den selben hof bis her fúr ain recht zinsaigen gehebt besessen vnd genossen habin von vnserm herren dem abt von sant Gallen, dem ain vierdvng wachs ze rechten zins dar ab gat vnd als er an vns vnd an vnser gotzhus komen vnd bracht ist. Also habin och wir in den selben hof geben vmb zway vnd viertzig pfunt gůter pfenning Costentzer múnss, der wir gar vnd gentzlich von in gewert sigin, vnd habin si in vnsern vnd vnsers gotzhus schinba^eren vnd redlichen nutzz geben vnd bekert, wan wir mit dem selben gelt ander gůt, das v´ns vnd vnserm gotzhus bas gelegen ist, gekofft habin. Vnd habin in och den selben vnsern hof ze Swartzenbach mit allen nútzzen rechten vnd zůgeho^erden fúr ain recht ledig zinsaigen gefertigot vnd vff geben mit allen den worten werken vnd geta^eten vnd mit aller kraft, so darzů hort vnd notdurftig was von gewonhait vnd nach recht. Vnd habin v´ns dar v´ber verzigen vnd verzihen vns offenlich vnd vmbetwngenlich mit disem brief fúr vns vnd alle vnser nachkomen vnd fúr das obgenant vnser gotzhus gen den vorgenanten der a^epptissenn vnd dem conuent des obgenanten gotzhus ze Maggnow vnd gen allen iren nachkomen aller aigenschaft aller lehenschaft aller vorderung aller ansprach alles schirmes alles vsszugs vnd alles des rechten, so wir an dem selben hof vnd den nútzzen rechten vnd zůgeho^erden, so darzů geho^erent, hatten ald von dekainen dingen iemer gewinnen mo^echtin von dekainer schlaht gericht ald recht gaistlichs vnd weltlichs vnd aller ander sach, damit dirr redlich vngeuarlich koff kúnd ald mo^echt in dekain wise gewendet bekrenket ald gebrochen werden. Vnd wa^er, das den selben hof nv^ ald hernach ieman anspra^ech fúr aigen ald fúr lehen, des so^elin wir vnd vnser nachkomen die selben die a^epptissennen vnd den conuent des gotzhus ze Maggnow vnd ir nachkomen verstan vnd versprechen an gaistlichem vnd an weltlichem gericht vnd an allen stetten, da si sin notdurftig sint, vnd des ir recht wern sin fúr ain recht ledig zinsaigen nach lantrecht a^vn alle geua^erd. Vnd ze warem vnd offem vrkúnd vnd sta^eter iemer werender iewiger^b) sicherhait habin wir die vorgenanten dú priorin vnd der conuent gemainlich des obgenanten gotzhus ze Zofingen vnsers gemainen conuents insigel offenlich gehenkt vnd geben an disen brief. Der ist ze Costentz geben, do man zalt von Cristus gebúrt drúzehen hundert iar, darnach in dem nún vnd sibentzigosten iare, an dem nehsten mentag vor sant Gallen tag.

Source Fulltext: Chartularium Sangallense IX, Nr. 5739, S. 404-405.