Wir des hailigen richs stett, die die buntnusse haltent vmb den Se¹, als wir vff hútt bi anander ze Costentz gewesen sigint, tunt kund aller ma^englich mit disem brief vmb die sto^ess vnd misshellung, so der erwirdig herre abt Cůn des gotzhus ze sant Gallen² vnd die lantlút ze Appazell³ vnd die zů inen geho^erent gegen an ander gehebt hant, darvmb si ze baider sit fúr v´ns komen sint, daz wir v´ns ze baider^a) sit darvmb erkent habent, daz die selben lantlút vnd die zů inen geho^erent gemainlich ir vorgenante(m) herren abt Cůnen hulden vnd sweren sont vor an gelert aid mit so^elichen worten, ald^b) hienach geschriben stât. Daz si dem selben irem herren, der da ze gegen vor v´ns was, als getrúw vnd ald hold sigint, als ain man sinem rechten herren billich sin sol, im vnd sinem gotzhus sini recht ze tu^end vnd dabi lassen beliben, als von alter biss her sitt vnd gewonlich gewesen ist, sinen vnd sins gotzhus nutz vnd fromen ze fúrderent vnd sinen schaden ze wendent, sin vnd sins gotzhus recht ze sagent an allen den stetten, da si des gefragot werdent von dem selben irem herren oder von sinen amptlútten, als ferre si daz wissent, vnd in vnd sin gotzhus getrúlich ze schirment vor aller ma^englich, als ferre si mugent, âne alle geuerde, vnd nach des selben abt Cůnen tod dem cappitel gemainlich des gotzhus ze sant Gallen ze wartent vntz ain ainen ainwelligen abt oder pfleger des selben gotzhus, doch also daz die selben lantlút vnd die zů inen geho^erent bi v´nserrm bund beliben sont, als si in gelobt vnd gesworn hant. Es ist och berett, wenne si die húldung getůnd, daz si sich danne zů den^b) vorgenanten irem herren fu^egen sont mit den stukken vnd artikkeln, die si vor v´ns den stetten vsszugent, vnd sont sich da, ob si mugent, mit des selben irs herren gnaden frúntlich vnd gna^edklich samnen vnd verainen vmb so^elich sto^ess vnd misshellung, so si zesament hant ze sprechent. Vnd wa^er, daz got wend, daz si sich ze baider sit mit an ander nit gesamnen noch verainen mo^echtent, vmb weles stukk si danne nit verainet werdent, daz selb stuk ains oder mer darvmb sont si wider fúr v´ns den bund vmb den Sew komen nach dero von Lindow⁴ manung vnd an ander rechtz darvmb gehorsam sin vor v´ns in aller der mase, als ob es ietz beschehen wa^er nach v´nser erkantnus, âne alle geuerde. Vnd des ze warem vrkúnd hant die von Costentz von v´nser aller haissens wegen ir stett insigel gedrukt vff disen brief. Der geben ist ze Costentz, do man von Cristes gebúrt zalt drúzehenhundert jar, dar nach in dem nún vnd sibentzigesten jar, an dem na^echsten zinstag vor sant Gallen tag.

Source Fulltext: Chartularium Sangallense IX, Nr. 5741, S. 407-408.