Wir^a) Wenczlaw von gotes gnaden Romischer kunig zu allen zeiten merer des reichs vnd kunig zu Beheim bekennen vnd tun kunt offenlich mit disem brieue allen den, die yn || sehen oder horen lesen, das wir haben angesehen stete getrewe vnd auch nutczliche dienste, die vns vnd dem reiche der erwirdig Cu^ene apte zu sant Gallen² vnser || vnd des reichs furste vnd lieber andechtiger offte vnd dicke vnuerdrossenlich getan hat vnd noch tun sal vnd mag in kunfftigen zeiten, vnd haben dorumb mit wolbe||dachtem mute rate vnserr vnd des reichs lieben getrewen yn vnd alle seynes goczhuses leute vnd mit namen die stat zu Wile³ vnd seyne lute zu Appoczell⁴ gefreyet vnd begnadet freyen vnd begnaden sie auch mit craffte dicz brieues, also das sie nyemants furbasmer ewiclich, wer er sey vnd in welichen eren vnd wirden er auch sey, die egenanten leute alle miteynander oder besunder furtreiben vordem ansprechen beclagen bekummern vrteilen oder achten sulle oder muge fur vnser kuniglich hoffgericht oder an den lantgerichten zu Rotweil⁵ oder an keynen andern lantgerichten oder gerichten, wo die ligen gelegen vnd wie die genant seyn, besunder wer dem egenanten vnserm furste vnd seines goczhuses leuten allen ir eynem oder me, er sey man oder weyp, zu sprechen zuclagen oder vordrunge hat oder gewynnet, der sal das tun vor dem richter vnd dem rate der egenanten stat zu Weyle vnd in andern gerichten, da dieselben leute sitczen, vnd recht von yn nemen vnd nyrgent anderswo, es were denn^e, das dem cleger oder clegerynn kuntlich vnd offenlich recht versayt wurde von den egenanten richter vnd rate in derselben stat zu Wile vnd von den andern des egenanten vnsers fursten leuten. Ouch wollen wir von besundern gnaden, das dieselben burger vnd alle des yeczuntgenanten vnsers fursten vnd seines goczhuses leute mugen offen echter husen vnd honen vnd mit yn alle gemeinschafft haben, also wer, das yemant derselben echter eynen oder czwen vil oder wenig in der vorgenanten stat zu Weile oder in des egenanten vnsers fursten gebieten oder gerichten anfeilet, dem sal man eyn vnuerczogen recht tun nach derselben stat zu Weile vnd der yeczuntgenanten gebiete vnd gerichte gewonheit, vnd als offte sie in dieselben stat gebiete vnd gericht(e) kumen vnd wider darauz, das sie nyemant ansprichet mit dem rechten, das sol den vorgenanten burgern vnd des egenanten vnsers fursten vnd seines goczhuses leuten allen keynen schaden bringen von der gemeinschafft wegen. Vnd gebieten darumb allen fursten geistlichen vnd werltlichen grauen freyen herren dienstluten rittern knechten stetten gemeinden dem lantrichter zu Rotweil vnd allen andern lantrichtern vnd richtern vnd den, die an den lantgerichten vnd gerichten sitczen zu den rechten vnd vrteil sprechen, die yczunt sein oder in kunfftigen zeiten werden, vnsern vnd des heiligen reichs lieben getrewen ernstlich vnd vesteclich bey vnsern vnd des reichs hulden, das sie furbasmer ewiclich den obgenanten vnsern fursten den apte keynen seiner vorgenanten burger oder leute eynen oder me man oder weip nicht für das egenant lantgericht oder ander gericht eyschen laden vordem furtreiben oder keyn vrteil vber ir leip oder vber ir gut sprechen oder in die acht tun sullen noch mugen in dheineweis. Vnd wo das geschehe wider diese obgenan(te) vnser gnade vnd freiheit vnd gnade, die in diesem vnserm brieue sein, so nemen vnd tun wir ab mit rechter wissen vnd kuniglicher mechte volkomenheit aller schulde ladung eyschung vordrung ansprach vrteil vnd die acht vnd entscheiden leutern cleren vnd sprechen, das sie miteynander vnd besunder alle vnkrefftig vnd vntugelich sein sullen, vnd tun sie ab vnd ouch vernichten sie genczlich vnd gar an allen iren begriffungen meynungen vnd punten, wie sie darkomen geben gesprochen oder geurteilt werden oder wurden. Vnd ob yemant, wer der were, der also wider diese obgenan(te) vnser gnade vnd freiheit freuelichen tete, der vnd die sullen in vnser vnd des heiligen reichs swere vngenade vnd darzu eyner rechten pene funffezig mark lotiges goldes verfallen sein, als offte der dawider tut, die halb in vnser vnd des reichs camer vnd das ander halbteyl dem offtgenanten vnserm fursten dem apte zu sant Gallen seynen burgern zu Weyle vnd allen andern seynen vnd seynes goczhuses leuten, die also vberfaren werden, genczlich vnd on alles mynnernuzz sullen genauen. Mit vrkunt diez brieues versigelt mit vnserr Romischer kuniglichen maiestat insigel. Der geben ist zu Prage nach Crists geburte dreyczenhundert jar, dornach in dem newnvndsibenczigsten jare, an sant Gallen tage, vnserr reiche des Behemischen in dem sibenezehendem vnd des Romischen in dem vierden jaren.

Source Fulltext: Chartularium Sangallense IX, Nr. 5744, S. 412-413.