Dem erwirdigen fürsten vnserm gnädigen herren abt Chuon dez gozhus ze st. Gallen¹. Vnsern dienst mit willen ze ewern sachen. Gnädiger herr, wir land ewer gnad wissen, daz vnser aidgenossen von sant Gallen vns gemant hant, daz wir vch verkünden sölint die klag, die si gen vch hant, vnd daz ir vch gen innen verantwurten wellint vff den nächsten mäntag ze reht vor vnser aidgenossen der stetten ze Buchorn², daz ist an sant Agatten abend,vnd sind dis die klagen, als sie sprechent, daz ir in wider rehtes tügint, daz ir in ir ingesessen geschwornen burger mit lantgerichten schwarlich angriffent vnd in die aht stössent wider ir statt frihait reht vnd gnad, die sie von Römischen kúngen vnd kaisern hant, vber daz, dz ir vch vormals begeben haben vor vns vnd anderen vnsern aidgenossen, was ir stösse vnd ansprach gen innen hettint oder gewunnent, daz ir der allweg für nieman komen danne für vns vnd vnser aidgenossen, vnd habent vch darüber verzigen ewer wirdikait ewers fürstlichen amptes ewer frihait ewers burgrehtes ze Lindow³ ewers dienst vnd burgrechtes, so ir haben gen vnser herschafft von Österreich, daz vch das alles davor nit schirmen solt. Darzu schribent si, vns sie och woll ze wissent, wie vormals zu Buchorn botten wurd, daz die stöss zwischent vch vnd inn bestan soltint one alle angriff, biz daz die stösse für den grossen bund getragen wurdint, da ir baidenthalb hinkomen soltint, da man och die stöss entschaiden solt. Darzu so wellint och vnser aidgenossen von Lindaw, wie ir doch ir burger sint, vch nit wisen vnd darzu halten, daz ir vch rehtes wellent lassen benügen von iren burgern nach des bundts sag. Gnädiger herr, als wir darumb von vnsern aidgenossen von sant Gallen gemant sint vnd als wir daz von vnsers bundes wegen gebunden sigin ze tunde, daz verkünden wir vch och, daz ir vch des vor vnsern aidgenossen ze Buchorn vff dem vorgenanten tag versprechen wellint. Geben an vnser frowen tag ze der liechtmisse vor vesper zit, anno M.CCC.LXXX primo. Von vns dem burgermaister vnd dem rate ze Costentz^a).

Source Fulltext: Chartularium Sangallense IX, Nr. 5828, S. 483.