Allen^a) den, die disen brief ansehent lesent oder ho^erent lesen, kúnd ich Laurentz Arnolt burger ze sant Gallen || vnd vergich offenlich mit disem brieue fúr mich vnd fúr alle min erben, daz ich mit gůter vorbetrahtung vnd von || miner redlichen not wegen den hof, den man nemmet Wa^eldi¹, der ainhalb stosset an Lúmaswille² vnd anderthalb || an den hof ze Windun³ vnd stosset ainhalb an die Holtzrúti⁴, mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit stok mit stain mit wasser mit wasser flússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^ert, ez sie genemptz oder vngenemptz gesůchtz oder vngesůchtz wissentz oder vnwissentz, redlich vnd reht aines sta^eten êwigen ko^vffes verko^vft vnd ze ko^vffenn geben han dem erbern wolbeschaidenn Cůnrat Vogelwaider dem metzger o^vch burger ze sant Gallen vnd sinen erben, ob er enwa^er, vmb ahtzig phunt vnd vmb siben phunt phenning gůter vnd gena^emer Costentzzer múnse, der ich gantzlich von im gewert bin vnd enphangen han vnd an minen offenn nutz bewendet, der selb vorgeschriben hof Wa^eldi min reht lehen waz von dem erwirdigen gotzhus ze sant Gallen, dannen ich im o^vch den selben hof mit allen rehten vnd mit aller zv^o geho^erde reht vnd redlich fúr reht lehen geuertgot vnd zv^o sinen handen braht han, alz reht sitte vnd gewonlich waz vnd alz ez kraft vnd maht sol vnd mag han, vnd sunderlich da fúr vnd in dem rehten, daz da von noch darab niht gât noch gân sol dann allain der korn zehend. Vnd darumb so han ich mich willeklich verzigen vnd verzich mich mit disem brieue gantzlich vnd gar fúr mich vnd fúr alle min erben dez vorgeschribenen hofes, den man nemmet Wa^eldi, mit aller zv^o geho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben, ob ich enwa^er, an dem zv^o dem vnd von dez vorgeschribenen hofes wegen ze Wa^eldi ie gehept han ald hie nach iemer gehaben oder gewinnen mo^ehtint, vnd daz ich noch enkain min erben noch nieman andre an v´nser stat noch von v´nsern wegen den vorgenanten Cůnrat Vogelwaider noch dehain sin erben noch nachkomen von dez vorgeschribenen hofes wegen, den man nemmet Wa^eldi, noch von dehainer siner zv^o geho^erde niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sache an alle geua^erde. Ich han o^vch gelobt mit miner trúwe fúr mich vnd alle min erben, dez vorgeschribenen hofes, den man nemmet Wa^eldi, mit aller zv^o geho^erde vnd dez ko^vffes reht wer ze sinne nach dez landes reht, vnd han dem egenemten Cůnrat Vogelwaider vnd sinen erben darúber zv^o mir ze merer sicherhait ze wem geben Johansen Arnolt minen brůder, der hat im mit mir gelobt mit siner trúwe, dez vorgeschribenen hofes Wa^eldi mit aller zv^o geho^erde vnd dez ko^vffes reht wer ze sinne nach dez landes reht vnd o^vch den vorgenanten Cůnrat Vogelwaider vnd sin erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sv darumb an gesprochen geschadgot oder vf getriben werdent mit dem rehten. Gieng o^vch der obgenant wer ab von todes wegen ald von andern sachen vnnútz wurd, so sol ich vnd min erben dem êgenemten Cůnrat Vogelwaider oder sinen erben, ob er enwa^er, ie ainen andern wern an sin stat geben darnâch inrent den na^ehsten vierzehen tagen, so er an v´ns geuordrot wirt ze hus ze hof oder vnder o^vgen, der alz gůt vnd alz gewiss sie vnd in allen den rehten, alz der waz, der ab gangen wa^er. Ich han o^vch gelobt, dem vorgenanten wern sinen schaden gantzlich ab ze tu^enne, in den er ka^emi von diser werschaft vnd gelúbt wegen. Vnd ze vrkúnd der warhait aller diser dinge so han ich Laurentz Arnolt da vorgenemt fúr mich vnd alle min erben min insigel gehenkt an disen brief. Ich der obgenant wer Johans Arnolt vergich ainer gantzzer warhait aller der dinge, so von mir an disem brief da vorgeschriben stant, vnd ze merer sicherhait der selben dinge so han ich o^vch min insigel gehenkt an disen brief. Der geben ist ze sant Gallen in dem jar, do man zalt von Cristus gebúrt drúzehenhundert jâr vnd darnach in dem ain vnd ahtzigostem jare, an dem na^ehsten donstag nach inga^entem o^vgsten.

Source Fulltext: Chartularium Sangallense IX, Nr. 5861, S. 524-525.