Allen^a) den, die disen brief ansehent oder ho^erent lesen, kúnde ich Heinrich von Kenelbach vogt der stat ze Rapreswil¹ vnd vergich offenlich an disem brief, das ich ze Rapreswil in dem mergte ân offner frijen || strasse offenlich ze gericht sasse, vnd kamen da fúr mich in offen gericht dú erber fro^vwe fro Elsbethe Gielin mit Wernlin Giel² ir elichem wirt vnd ir rechten vogt burger ze Rapreswile, || vnd fůgt vnd gab da dú selb Elsbethe Gielin mit ir elichem wirt vnd vogt willen vnd gunste recht vnd redlich vrpflichtz zwêne eimer wins vnd drij mút kernen jerlichs vnd êwigs || geltz durch Johansen von Langenhartz³ seligen wilunt ir elichen wirtes sêle heil willen vnd o^vch hie nach durch ir sêl willen an sant Laurencien altare ze Rapreswil⁴ in der kilchen, vnd satzte die selben zwene eimer wins vnd die drij mút kernen geltz vff ein juchart ra^eben, dú ze Obern Meilan⁵ gelegen ist, das man nemt daz Jung gůt an der gebreiten, sto^vst einhalbe ân Walthers Kalchers ra^eben von Zúrich vnd andrenthalb ân die landstrasse, vnd dar nach vff ein halb juchart ra^eben, dú o^vch ze Obern Meilan gelegen ist, dú man nemt Vor der Wise, sto^vst einhalb an Eberhartz Wu^esten ra^eben von Rapreswil vnd andrunt an Cůnratz Webers ra^eben von Meilan⁶, die selben ra^eben sind alle ledig frij eigen, o^vch sol man wússen, das dú egenant fro Elsbethe Gielin die zwêne eimer wins jerlichs geltz von den vorgenanten ra^eben richten vnd weren sol jerlich vff sant Martis tag, die wil si lebot, dar zů so ist o^vch mit namen berett, daz Johans vnd Růtschman von Langenhart⁷ gebrůder oder ir erben, ob si enwerent, die vorgenanten drij mút kernen geltz jerlich o^vch vff sant Martis tag richten vnd weren sond an sant Laurencien altare. Vnd were aber, daz si die drij mút kernen geltz jerlich also nicht wertint, so sol do^vch darvmb dú egenant Elsbethe Gielinen, diewil si in lib ist, noch Wernlin Giel ir wirt vnd die vorgenanten ra^eben alle nieman angriffen noch in kein wise bekúmbern weder mit gericht noch ane gericht noch mit keinen sachen ane geuerde, aber wele kapplan vff sant Laurencien altar ist, der mag denn wol Johansen vnd Růtschman von Langenhart oder ir erben vmb den versessnen zins no^eten vnd vfftriben mit geistlichen vnd weltlichen gerichten, vntz das er des gentzlich gewert wirt. Vnd wenne aber danne dú vorgenant fro Elsbethe Gielin von todez wegen abgat, so ist berett vnd sol man wússen, wêr denne die vorgenant juchart vnd die halben juchart ra^eben ze Obern Meilan inne hett nússet ald buwet, der sol denne aller jerlich die zwene eimer wins vnd die drij mút kernen geltz âne allen fúrzug richten vnd weren vff sant Martis tag an sant Laurencien altare, daz si einem kapplan werden vnd gelangen, weler ie denne ze mal den selben altar besingt mit des ratez vnd der burger willen vnd gunste. Vnd were o^vch, das dú vorgenant fro Elsbethe Gielin oder ir erben hie nach iemer die zwen eimer wins vnd die drij mút kernen geltz vff endrú gu^eter fu^egen vnd setzen wo^elti oder vff andren ir gu^eter gewisen oder anderswa ko^vffen mo^echt, daz mag si wol getůn mit semlicher bescheidenheit vnd gedingen, was erber lútt dunk vnd sprechen bi gůten trúwen, da mit denne sant Laurencien altar wol versorgot sie, das er dar an habent sie nv vnd hie nach vmb die zwene eimer wins vnd die drij mút kernen jerlichs geltz, wenne daz beschicht vnd also volgat, so sond danne die ra^eben ledig sin vnd nicht e. Vnd also het dú vorgenant fro Elsbethe Gielin dis alles volfu^ert mit ir elichen wirt vnd vogt Wernlin Giel willen vnd gunste mit aller ehafti worten vnd werchen, so hier zů notdurftig was vnd billich kraft vnd handvesti haben sol nv vnd hie nach. Vnd were o^vch, das es sich keins iars verzikti, das die zwen eimer wins vnd die drij mút kernen geltz vff sant Martis tag oder in dem na^echsten manod dar nach an geuerd nicht gantzlich gewert wurdint, so mag denne ein kapplan ze sant Laurencien altar wer die ra^eben inne hett nússet vnd buwet no^eten beklagen vnd vftriben vor geistlichen vnd weltlichen gerichten also verre, vntz das er dez wins vnd kernen gantzlich gewert wirt, dez er ie denne ze mal vss litt vnd nit gewert ist. Vnd^b-) dez ze vrkúnde, won dis vor offem gericht beschehen ist, alz gericht vnd vrteil gab, da von so han ich Heinrich von Kenelbach vogt min insigel von dez gerichtez vnd durch beider teil bette wegen offenlich gehenkt an disen brief. Vnd ze merer sicherheit so haben wir die vorgenanten Johans vnd Růtschman von Langenhart v´nser insigel offenlich gehenkt an disen brief fúr v´ns vnd v´nser erben, won dis allez mit v´nserm gůten willen vnd gunst volfu^ert vnd beschehen ist. Dis beschach vnd wart dirre brief geben an dem nechsten zinstag nach sant V^olrichs tag in dem iar, do man zalt von gottez gebúrt drúzehenhundert jar vnd eins vnd achtzig jar^-b).

Source Fulltext: Chartularium Sangallense IX, Nr. 5856, S. 517-518.