Allen den, die disen brief an sechent oder ho^erent lesen, kúnde ich Heinrich von Kenelbach vogt der stat ze Rapre||swil¹ vnd vergich offenlich an disem brief, dz fúr mich kament die erbern lúte Růdolf Túmter, den man nempt || Keller, burger ze Rapreswil ze einem teile vnd Heinrich Wiss der jung vs der March² ze dem andren teile, || vnd veriach da for mir der vorgenant Heinrich Wiss fúr sich vnd sin erben, das er Růdolf dem Keller vnd sinen erben, ob er enwere, recht vnd redlich ze ko^vffenne geben hetti aller jerlich ein halb fiertel anken ewiges geltes vnd hetti im dz geben in dem gůt, dz vf der siten gelegen ist, dz man nempt der Tutze³, stost einunt an Walthers rúti⁴ vnd stost andrunt an Heinis Wissen kumben, dz selb gůt ist ledig frig eigen, vnd hier vmb so hetti der vorgenant Heinrich Wiss von Růdolf dem Keller enpfangen in eins rechten bestetten ko^vfs wise fierzehenthalb pfunt pfenning Zúricher múntz genger vnd genemer, der er gentzlich von im gewert weri vnd in sinen gůten nutz komen weren nach siner vergicht. Vnd mit dem gedinge, dz der vorgenant Heinrich Wiss oder sin erben, ob er enwere, ald wer denne dz obgenant gůt inne hett nússet oder buwet, jerlich vf sant Martis tag Růdolf dem Keller oder sinen erben, ob er enwere, dz halbe viertel anken gen Rapreswil in dú statt richten vnd weren sond gentzlich an allen sinen schaden. Vnd were aber, das er des deheins jares vs lege vnd des anken nit gewert wurde vf sant Martis tag ald in den nechsten acht tag dar nach an all geverde, so mag denne Růdolf Keller oder sin erben, ob er enwere, dz vorgenant gůt an griffen, wie es ime fu^egt, vnd dz besetzzen vnd entsetzen also verre, vntz dz er sines anken des zinses jerlich sicher sie vnd des gewert werde an allen sinen schaden, vnd sol in dar an nieman sumen mit keinen sachen, vnd also gab er dz halb viertel anken vf an min hand vnd vertgotz Růdolf dem Keller in sin hand, als man es in frien gu^etern vfgeben vnd vertgon sol mit allen worten, als es notdúrftig was vnd billich kraft vnd macht haben sol vnd mag nv vnd hienach. Vnd des ze einem waren vrkúnd vnd gantzer sicherheit alles, so an disem brief geschriben stat, das es war vnd stet sie, da von so han ich Heinrich von Kenelbach vogt min eigen insigel durch der vorgenanten ir beider teile ernstlicher bett wegen offenlich gehenkt an disen brief mir vnd minen erben vnschedlich. Der geben ist an dem nechsten zinstag for sant Johans tag ze súngichten in dem jar, do man zalt von gotz gebúrt drúzehenhundert vnd achtzig jar vnd dar nach in dem ersten jar.

Source Fulltext: Chartularium Sangallense IX, Nr. 5850, S. 509-510.