Dem erberen herren grauen Herman von Svlz¹ houerihter mines herren kvnig Albrehtes dez Ro^emeschen kvniges enbut ich graue Herman || von Honberg² minen dienest vnd^a) tv^on vch kvnt, als mir von houe vnd von dem gerihte bevolhen wart in der sache einsit grauen Friderichs II von Toggenburg dez alten³ vnd andersit Ysaachs Herren dez Juden von Friburg⁴, die kamen beidsit vur vns ze Basel, als in der tag ge||maht wart. Do saste der vorgenante von Toggenburg hern Peter den Schaler vnd hern Mathis den Riehen ritter von Basel von sinen wegen vnd Ysaach Herre der Jude hern Hiltebranden Spenlin von Spanegge⁵ vnd hern Walthern Spo^erlin von Friburg von sinen wegen ze mir. Do greif graue Friderich von Toggenburg an sin gezvge, als er von houe gescheiden waz, vnd zoch sin warheit an Viuelin den Juden von Klingenowe⁶ Bischofes brůder, von dem dv sache von erste růrte, der da ze gegem waz in dem houe, da ich ze gerihte saz, vnd gebot deme Juden mit vrteil dristvnt vur mich, als da erteilt wart, daz er ein warheit Seite, die er wuste vber die selben sache, der Jude wolte vur nvt, do wart erteilet, daz ich in mit gerihte twingen solte, do konde mir nieman gesagen, wie ich in getwingen solte oder waz besservnge drvber horte, vnd dar vmbe bit ich vch, daz ir mir enbietent, wie ich den jvden vnd ander Juden getwingen svlle, an die er sin warheit zvht. Do greif er an ander sin gezvge vnd gedingete siner warheit an hern Ro^edegern den Manessen von Zvrich, vnd iach im och der siner warheit mit dem eide, als verre daz da mit vrteil erteilet wart, daz er ime volleclich geholfen hette, och half im her V^olrich von Scho^enenwerde⁷ dez selben mit dem eide als her Ro^edeger der Manesse, vnd seitent die beide vf irn eit, daz der vorgenante Viuelin ze gegen waz vnd ander Juden vnd cristen genv^oge, da div satzunge geschach von dem vorgenanten von Toggenburg vnd Bischof dem vorgenanten jvden, vnd da von gaben wir dem vorgenanten von Toggenburg einen andern tag an dem nehesten mentage vor wienahten, daz er da sin gezvge leite, als verre als er mac, oder an andern tagen, die im geben werdent, vnd wart och vor vns erteilet mit gevallern vrteile, wer daz der vorgenante Viuelin sturbe vnze ze den vorgenanten tagen, daz er geholfen hette dem vorgenanten von^b) Toggenburg, wan ez wanlich waz, daz er nvt sagen wolte dvr sines brůder willen dez vorgenanten Bischofes, von dem dv sache^c) da ro^eret, vnd daz diz war si, daz spriche ich graue Herman bi minem eide, vnd wir die vorgenanten viere her Peter der Schaler, her Mathis der Riche, her Hiltebrant Spenlin vnd^d) her Walther Spo^erlin bi vnserm eide, daz wir diz sahen vnd ho^vrten, vnde^e) her vber zeinem waren vrkvnde so han wir der vorgenante graue Herman vnd die vorgenanten viere vnser ingesigele gehenket an disen gegenwurten^f) brief. Diz geschach ze Basel in dez to^vmbroptes^f) houe, do man zalte von gottes geburte drizehen hundert jar, in dem ersten jare, an der mitwochen vor sant Andres tage.

Source Fulltext: Chartularium Sangallense V, Nr. 2546 S. 44.