Ich Wernher der Hund¹ burger ze sant Gallen kund allen den, die disen brief lesent oder ho^errend lesen, das ich sechs pfund pfenning Costenczer muncze han geben den siechen an dem Linsibu^el² durch got ze stur an dem aker, der bi inen lit, den si gekouffet hand vmb Heinrich Ro^ewat, der munczer ist ze sant Gallen, also das si iemer me vnser sond gedenken miner Wirtinnen Bertun vnd mines vatters Heinr. vnd miner můter Junten vnd miner tochter Katherinen vnd aller miner vorfarn vnd aller gelo^eibigen selen, vnd han gedinget, das man jerlich sol geben von dem selben aker XII ß ze vasten den siechen vmb scho^enste brot, so man denn vindet veil, vnd sol man ie ze der wochen II ß inen geben vmb brot, alsso das si min vnd die hie vor geschriben stand nit mugend vergessen, vnd geschech das iro pfleger das ein vasten vbersech, so sol der spital der siechen des heilgen geistes³ das jar den selben nucz nemen⁴. Vnd das dis alles sta^et vnd gancz belibe, so henk ich Wernher der vorgenempt min insigel an disen brieffze einem sta^eten vrkund. Wir die vorgeschriben siechen an dem Linsibu^el henken och vnser insigel an disen brieff ze einem sta^eten vrkund aller der ding, so hie vorgeschriben stand. Diser brieff ward geben ze sant Gallen nach dem palmtag, do von gottes geburt waren tusent dnihundert vnd in dem andren jare.

Source Fulltext: Chartularium Sangallense V, Nr. 2562, S. 56-57.