Allen den, die disen gegenwurtigen brief sehent alder ho^erent lesen, kvnden wir .. der bivrgermaister, .. der amman vnd .. der || rat von Costentz, daz wir willeclich vnd mit gůter betrahtvnge vmb die vnliebi vnd daz widermv^ete, so vnserm her||ren graven||
Kraften von Toggembvrch korherren ze dem tv^ome ze Costentz¹ in vnserr stat widerfv^or vnd be||schehen ist, dem vorgenanten vnserm herren grauen Kraften vnd grauen Friderichen sinem brůder² ze besservnge vnd ze êren vnd zainer lieplichen rihtvnge geben haben vnd geben an disem briefe vnser wise, der man sprichet dv Rinwise bi Eggenhusen³, ze ir baider libe an vnserre vnd an der bvrger stat gemainlich von Costentz, vnd daz o^vch wir .. der vorgenante bvrgermaister, .. der amman vnd .. der rat von inen baiden die vorgenanten wise an vnserr vnd an der bvrger stat gemainlich von Costentz enphangen haben mit den gedingen, dv hie nach geschriben stant. Ez ist gedinget, swer des rates wirt ze Costentz, der die vorgenanten wise von inen baiden vor niht enphangen hat, daz der die selben wise von inen baiden enphahen sol ze lehen, vnd swele si ainest enphahet, der ist si nvt mêr gebvnden ze enphahenne. Ez ist o^vch gedinget, swenne die vorgenanten vnser herren graue Kraft vnd graue Friderich ensint, so ist vnser, die des rates sint, noch der bvrger dekainer gebvnden, die wise von dekainem iro êrben ald ir nachkomen ze enphahenne, vnd sol vnz vnd vnserr stat dv vorgenante wise ledig sin mit allem rehte. Wir die vorgenanten grave Kraft vnd graue Friderich gebrv^oder von Toggembvrch veriehen des offenlich an disem briefe fvr vnz vnd fvr alle vnser êrben vnd vnser nachkomen, daz die vorgenanten bvrger von Costentz vnz die vorgenanten wise mit dem gedinge ze vnser baider liben vnd niht fvrbaz geben hant, vnd daz si ie der rât, swer denne des rates wirt ze Costentz, von vnz enphahen sol, der si vor niht enphangen hat, vnd swenne wir zwene die vorgenanten graue Kraft vnd graue Friderieh ensien, daz denne enkain vnser erbe noch vnser nachkome mit der vorgenanten wise mêr hat ze tv^ende noch ze schaffenne, vnd daz die vorgenanten bvrger der gelvbde vnd der manschaft ledig vnd la^ere sint vnd sin sont an allen dingen. Vnd zainem vrkvnde der warhait alles des, so vorgeschriben stat, so hiessen wir die vorgenanten gebrv^oder graue Kraft vnd graue Friderich, .. der bvrgermaister, .. der amman vnd .. der rat von Costentz diser briefe zwêne gelich schriben, vnd haben o^vch die besigelt mit vnser zwaier gebrv^oder vnd mit der stat von Costentz insigeln. Dierre brief wart geben ze Costentz, do man zalte von gottes gebvrte drvzehenhvndert jare vnd in dem nvnden jare darnach, an dem na^ehsten fritage nach sant Gerdrut tage.

Source Fulltext: Chartularium Sangallense V, Nr. 2717, S. 161-162.