Ich graue Fridrich von Zolre, des Schalkesburg¹ ist, tůn kunt allen den, die disen brief gesehent oder geho^erent II lesen, daz ich mit hern Hiltebolde von Werstain dem portener ze sante Gallen² gerihtet vnd geschlihtet II bin lieplich vnd gůtlich, also daz er mir het varn gelan luterlich baidu fur sich vnd sin gotzhus II allen den schaden, den ich vnd mine vordem in getan haben vf den ho^euen ze Vrumarn³ vnd ze Truhtoluingen⁴ vnd an dem, daz da zv^o ho^eret, vntz vf disen hutigen tag. Er het o^vch varn gelan allu gerihte gaischlichu vnd weltlichu, alle brieue vnd allen schaden, den er aide daz gotzhus da von genomen hant, vnd dar vme so han ich gelobet bi miner truwe vf minen ait, daz ich den vorgenanten hern Hiltebolden von Werstain den portener hinnanhin niemer geirren noch geschadegen sol an kainen sinen rehten, du er het von dez gotzhuses wegen ze sante Gallen vber die vorgeschriben ho^eue ze Vrumarn vnd ze Truhtoluingen. Wa^ere aber, daz ich der gelubde verga^esse, daz nit sin sol, so han ich mich dar zv gebunden, daz ich in allen den schulden vnd gerihten gaischlichen vnd weltlichen vme den schaden, so ich in han getan, gegen in stan sol alse hute diz tages vor disen tegedingen, vnd daz diz war si vnd sta^ete blibe, dar vme han ich min ingesigel an disen brief gehenket ze ainem vrkunde der warhait. Der wart geben ze Balgingen⁵ an dem na^ehesten zistage vor sante Jacobes dage, do man zalte von gottes geburte druzehenhundert jar, dar nach in dem nunden jare, vnd waren bi disen tegedingen her Walgger von Bisingen⁶ ain ritter, Wernher von Werstain⁷, Swenger von Liehtenstain⁸, Cůnrat von Megensh(eim)⁹, Růdolf Branber, Hartman der vogt, Hainrich der keller von Truhtoluingen vnd ander biderber lute vil.

Source Fulltext: Chartularium Sangallense V, Nr. 2725, S. 168.