Ich Hainr. von Wartenberg dv^on allen den kv^ont, die disen brief sehent vnd^a) II ho^erent lesen, daz der .. bropst von Ouwe gewert het gar vnd gaenzlich || Cv^onrat den Vokt von Meringen zwainzich march Silbers, darumbe der .. apt II von sant Gallen mir vnd hern Johannes Venden von Riethain ritter vnd den anderan .. burgan^b) sinen brief geben het, daz er vns lo^esen wolti von allem schaden. Ich der vorgenant H. von Warteberg wil och wer vnd tro^ester sin mines herren dez .. aptes von sant Gallen, daz im niemer schade beschehen mag von dem vorgenanten brief, den er vns geben het ze werscheft vmbe die vorgenantvn burschaft^c), wan der brief verlorn ist, ane alle gevaerde. Vnd daz dis allez ware si vnd staethe belibe, so henche ich der vorgeshriben H. von Wartenberg min ingesigel an disen brief. Diz beschah vnd wart der brief geschriben, do man zalt von gottes geburthe druzehenhunder^d) in dem zwelftem^e) iare, an dem naehsten fritage nah sant Nicholaus dage.

Source Fulltext: Chartularium Sangallense V, Nr. 2836, S. 227.