Wir Hiltpolt von gotes genaden abt¹ des gotzhus von sant Gallen Costenzer bystmv^ons^a) vnd aller der conuente gemainlich des || selben gotzhus vergiehen offenlich vnd to^egen kvnt an disem gegenwvrtigen brief allen den, die in sehent, lesent oder ho^erent lesen, || das wir mit gemainem rat vnd mit gv^oter betrachtunge vnd das es vns vnd vnserm gotzhus besser getan ist danne vermitten vnd och || mit vnsers gotzhus dienstmannen rat vnd wissend haben verkoffet vnd ze koffend geben redlich vnd recht sellv dv go^eter vnd Ivte, dv hie nah geschriben stant, ze Mo^erishusen² vnd ze Bargen³ mit allen den rechten vnd ehaeftin, die dar in geho^erent, es sige gesv^ochtz ald vngesv^ochtz, genemtz ald vngenemtz an holtz ald akker ald an velde, an wisen, an wasen ald an zwi, an wasser ald an wasser flvssen ald wie man es genemmen kan ald mak, vnd sint das dv go^eter, dv go^eter, dv Cv^onrat der Celner vnd Hainrich sin brv^oder von Mo^erishusen bvwent, vnd dv go^eter, dv ir etterren sun Cv^onrat der Celner bvwet, vnd dv go^eter, dv Johans Walthers bvwet, vnd dv go^eter, dv Johans Claevsinun bvwet, vnd den zehenden, den man da nemmet sant Gallen zehenden, der zehend vnd dv go^eter, dv aellv ze Mo^erishvsen ligent, vnd dv go^eter ze Ober Bargen⁴, dv Cv^oeni der Rote bvwet vnd Berchtolt der Do^erflinger vnd Burgi der alt vnd Ro^edi sin brv^oder vnd V^olrich von Ober Bargen, vnd och die Ivte, die hie nah geschriben stant, vnd sint das die Ivte, Cv^onrat der Celner vnd Hainrich sin brv^oder vnd ir wirtenen vnd irv kint vnd ir swester Anna vnd Cv^onrat der Celner ir etterren sun vnd Johans Walthers vnd sin wirtin vnd sinv kint vnd Berchtolt der Doerflinger vnd sin wirtin vnd sinv kint vnd Co^eni der Rote vnd sin swester dv Schallerin. Dise Ivte vnd dv go^eter haben wir geben, als da^b) vor geschriben stat, vmbe zwai hvndert mark gv^otes silbers Costenzer gewaegs dem spital ze Scha^vfhvsen⁵ vnd des spitals maistern, die wir von inen gar vnd gsentzlich enphanggen haben vnd ir gewert sigen an barem vnd beraitem silber vnd an vnsern vnd vnsers gotzhus offenbaren nutzz komen sint an den steten, da wir vnd vnser gotzhus grossen schaden hatten vnd den wir da mit verkamen, vnd won dv selben go^eter vnd Ivte vnser vnd vnsers gotzhvs recht aigen waren vnd an das porten ampt ze sant Gallen gehorten, dem sie och mit anderen go^eter wider lait sint, dv vor dar an nicht gehorten, da von so geben wir vnd haben geben vnd antworten vnd haben in geantwortet dem spital vnd des spitals maistern die vor geschriben Ivte vnd go^eter fur recht aigen mit allen den rechten vnd nutzzen, als wir vnd vnser gotzhus biz her sie behebt vnd bracht han, das sie ir recht aigen sigen, vnd svlen wir vnd vnser nahkomen vnd vnser gotzhus der vor genamten Ivte vnd go^eter recht wer sin des vor geschriben spitals vnd spital maister fur alle ansprachhe gaistlichs vnd weltlichs gerichtes. Wir behalten och vns vnd vnserm gotzhus alle die Ivte, die an disem brief nicht verschriben sint. Wir abt Hiltpolt vnd aller der conuente des gotzhus von sant Gallen vergiehen vnd sunderbar ich her V^olrich von Enne portener⁶ des selben gotzhus vergich, das die vor geschriben lvte vnd go^eter horten an das porten ampt ze sant Gallen, das ich der vor genemt her V^olrich von Enne iezent habe vnd phlige, vnd das dv vorgeschriben go^eter vnd lvte dem porten ampt wider lait sint mit anderen go^eter, dv vor an das porten ampt nicht horten, vnd das das alles war sige, staet vnd vnuerwandelt belibe, dar vmbe so enzihen wir vns für vns vnd fur alle vnser nahkomen aller der briefe, die wir vnd vnser gotzhus iezent han ald her nah gewinnen von Rome ald anderswannen, aller der gesezzte, die iezzent sint ald her nah werdent, alles des schirmes vnd der helfe gaistlichs vnd weltlichs gerichtes, vnd ist diz alles beschehen, als recht, sit vnd gewonlich ist, mit worten vnd mit werken, so dar zv^o notdvrftig was vnd ist von recht ald von gewonhait, vnd ze ainer merer sichherhait, das es war sige vnd staete belibe, dar vmbe so geben wir der vor genemt abt Hiltpolt dem vor geschriben spital vnd spital maistern disen brief besigelten mit vnserm insigel. Wir die vor genemten herren des conuentes des vor geschriben gotzhus von sant Gallen vergiehen ain warheit aller der dinge, so da vor geschriben stant, vnd ze ainer besserre vnd merer sichherhait, das es war sige, so henken wir och vnsers conuentes insigel an disen brief. Ich her V^olrich von Enne portner des vorgeschriben gotzhus ze sant Gallen vergich an warhait aller der dinge, so da vor geschriben stant, vnd ze ainer warhait, das es war sige vnd staet belibe, so henke ich och mit^c) insigel an disen brief. Diz^d) beschah vnd wart dirre brief geben ze sant Gallen, an vnser frvwen abent ze dem aernde, do man zalt von Christes gebvrte drvzehen hvndert iar vnd dar nah in dem zwainzegosten iar.

Source Fulltext: Chartularium Sangallense V, Nr. 3085, S. 383-384.