Allen den, die disen brief sehent lesent oder ho^erent lesent^a), kunden wir Růdolf vnd Johans die schenken von || Glatburg¹ gebrůder vnd veriehent des offenlich an disem briefe, das wir durch vnser sele haile gegeben haben || vnd geben an disem briefe Hainrichen der Gehusen sun, der vnser aigen was, dem gotzhuse ze sant Gallen vnd || das wir von im darumbe in ko^vfes wise enphangen haben funf phunt phenninge Costenzer munze, die an vnsern redelichen nutz komen vnd bekeret sint. Wir haben o^vch bi dem edeln herren hern Cu^onraten von Bussenank² den vor genanten Hainrichen vf gesendet dem edeln hochgeerten herren apt Hyltpolten von gottes gnaden apt³ ze sant Gallen vnd an im verzigen alles vnsers rehtes. Wir veriehen o^vch des offenlich an disem briefe, das wir baide ze den hailigen gesworn haben mit gelerten worten, das wir^b) vmb den vorgenanten Hainrichen der Gehusen sun enkain ansprache noch vorderunge niemer sont gewinnen, won wir vns an im verzigen haben alles vnsers rehtes. Vnd ze ainem vrkunde ainer warhait alles des, so hie vor geschriben stat, henken wir die vorgenanten Růdolf vnd^c) Johans die schenken von Glatburg vnser baider insigel an disen brief. Der wart gegeben, do man zalte von gottes geburte druzehen hundert jare vnd in dem aimvndzwainzgosten jare, dar nach an dem vritag vor sant Andres tag.

Source Fulltext: Chartularium Sangallense V, Nr. 3144, S. 423.