Allen den, die disen brief sehent oder ho^erent lesen, kunden wir Hartman von Baldegge der alte, Růdolf von Ramswag, Eberhart von Eppenstein, || Johans von Mvnchwile ritter vnd Andres von Wilberg knecht, de wir durch liebi, die wir zem chloster haben ze Tenninkon¹, vnd durch || got, nachdem vnd Hiltpolt vnd Walther von Bichelnse gebrůder vf gegaben vnserm herren von gottes gnaden abt Hiltpolt ze sant || Gallun, waz si vom^a) ime vnd von dem selben gotzhuse ze sant Gallun ze lehen hatten ze dem dorfe, dem man sprichet O^ettenhvsen, den obern^b) kelnhof in dem vorgenandem dorfe mit twingen, mit bennen, mit aker, mit wisen, mit holtz, mit velde, mit aller gewaltsami, so zů dem vorgenanden dorf oder hof ho^eret, ân die lute ze dem selben dorfe vnd ân den zins, den vro Anna von Werdegge vf dem nidern kelnhof wartend ist ze dem vorgenanden dorf ze O^ettenhusen, die die vorgenanden brůder von Bichelnse inen selber behalten hant, von dem vorgenanden vnserm herren dem abt an des vorgenanden chlosters stat als getruwe trager enpfiengen vnd enpfangen haben, swaz die vorgenanden gebrůdere von Bichelnse ze dem vorgenanden dorfe O^ettenhvsen ze lehen von sant Gallvn hettent vnd vf gegaben als vorgeschriben ist, vnd veriehen o^vch, de wir ze den selben gutem nicht rechtz haben anders, dan als wir hie vor geoffenet vnd veriehen habin, vnd enso^elent wir noch vnser nachkomen de selbe gotzhus ze Tenninkon an den vorgenanten gu^etern niemer betru^eben noch keinwis beswerin, vnd so^elen dem selbem^a) chloster ze Tenninkon die vorgeschriben gu^eter tragen vnd schirmen ân alle geuerde als getruwe trager, beschech o^vch, dc vnser herre der vorgenande abt oder sin nachkomen dv vorgenanten gu^eter dem chloster ze Tenninkon vertgon wo^eltin vnd wir da zů no^eturftig werin oder nutz ze vf gebenne ald ze andren sachen, wa de vnder vns allen drie tůnt an ir selbers vnd vnser alr stat, die son des gewalt han, vnd hat daz kraft vnd macht, als ob wir ez alle tetin, wir vnd vnser nachkomen sulen o^vch mit vf geben vnd andren sachen tun vmb die vorgenanden gu^eter, als dez vns bittent vnd můtent dv abtischinne vnd der conuent des chlosters ze Tenninkon. Vnd dc dis war si vnd stet belibe, so henken wir vnser insigel an disen brief ze einem vrkvnde aller der dinge, so vorgeschriben stat, vnd geben inen disen brief also besigelten. Dirre brief wart gegeben, do man zalte von gottes geburt druzenhvndert jar, dar nach in dem zwenzgosten jare, an dem nechsten zistag nach vsgender osterwuchen.

Source Fulltext: Chartularium Sangallense V, Nr. 3154, S. 430.