Wir Elsebete von gottes gnaden eptissin des gotzhus Zurich¹ kunden allen, || die disen brief sehent oder ho^erent lesen, das Otto Thu^escher burger Zurich || sin rebe, die ze Riespach² sint gelegen zwischen dien reben Bilgris vf dem || Bache vnd^a) Otten seligen Manessen .. kinden vnd dar vndenan stosset Johans gůt von Opfinkon³, die von vnserm gotzhus vmbe ein pfenning erbe sint, fron Margretun Johans seligen wirtin Gamelunsteins von Raprechtswile⁴ ze ko^vfen hat gegeben in allem dem rechte vnd der ehafti, so der zů geho^ert, vmbe fvnf vnd sechzig march Silbers, vnd ist ouch von ir des gewert nach sinre vergicht, vnd gab Otto Thuscher die vorgenanden rebe mit allem dem, so der zů geho^ert, vnd mit allem rechte vnserm gotzhus vf an vnser hant mit dem gedinge, das wir die selben rebe der vorgenandun fron Margretun ze erbe lihin, vnd nach dem gedinge vnd dur sin bette do lihen wir an vnsers gotzhus stat die vorgenanden rebe mit allem dem, so der zů geho^ert, vnd mit allem rechte der vorgenandun fron Margretun Gamelunsteinin ze rechtem erbe vmbe den cins, der vor ist genemet, jerlich ze gebenne ze des heiligen kruces mes ze herbest vns vnd vnserm gotzhus ewekliche. Ouch lobt Otto der vorgenande Thuscher fur sich vnd sin erben vnd bint ouch die dar zů, der rebon, die vor sint genemet, mit allem dem, so der zů geho^ert, vnd mit allem rechte wer ze sinne fur recht erbe von vnserm gotzhus der vorgenandun fron Margretun vnd ir erben nach rechte, swa ald swenne mans bedarf. Vnd hieruber das dis alles war si vnd stet belibe, dur die bette Otten des vorgenanden Thuschers geben wir der vorgenandun fron Margretun vnd ir erben disen brief besigelt mit vnserm ingesigel zeim ewigen offen vrkunde. Dirre brief wart geben, do von gottes geburt waren drucehen hundert jar^b) vnd dar nach in dem zwei vnd zwencigosten jare, an dem cistage vor sant Walpurg tult, da ze gegeni waren her Heinr. meister Walt, seligen sun vnser korherre⁵, her Růd. der Truchsetze von Raprechtswile⁶ ritter, Heinr. von Raprechtswile, Ru^edeger sin sun, Růd. vnd Wernher Negellin gebrůder, Heinr. Gamelunstein, Heinr. Abdorf vnd ander erber lute.

Source Fulltext: Chartularium Sangallense V, Nr. 3156, S. 431-432.