Allen dien^a) disen brief sehent alder ho^erent lesen, kunde ich Růdeger von Werdegga, daz ich die rehtunga der vogteia drier hofstet||te^b) vnd dez gůtez, daz da Hugliz gůt haisset^c) ze Adoltswile, daz da etwenne hiesse der Webron gůt, die ich hatte ze rehtem lehen von dem gotz||huse ze sant Gallen vnd jerlichez geltent ze rehtem vogtrehte achzehen Schilling Pfenningen vnd vier hůnre, verko^vffet han den erberen || herren .. dem abte vnd dem conuente dez gotzhusez ze Ruti vmb zwainzik pfunt vnd funf pfunt Pfenningen Zuricher^d), der ich alleklich gewert bin vnd an andren min nutz gekert han. Der selber drier hofstette vnd der gu^etron, so da vor genemmet ist, vogtrehtunge han ich geben vnd gib ez inen an disem gegenwrtigem brieve ze hanne vnd ze besitzenne vnd ze niessenne^e) eweklich, fridelich vnd ru^eweklich an allen dingen vndienstber, mit husern, mit wisen, mit akeren, mit holtze, mit waide, mit wunne, mit velde, mit zinse, mit wassere, mit ingange, mit vzgange, mit aller ander rehtunge vnd nutze, so ich ez hatte vnd dar zů ho^eret. O^vch habe ich mir behalten die rehtunge, daz die lute, die uf den gu^etron sitzent, zwiro in dem jare ze maiien vnd ze herbst sich antwrten vur gerihte, als dez dorfez sitte vnd gewonhait ist. Der selber huser vnd gu^eter vogtrehtunge han ich vf geben vnd mich entzigen, als ich dur reht solte, in minez herren hant abt Hiltpoltz von sant Gallen mit aller der redlichi, so dar zů horte vnd ich tůn solte, vnd bat in flehlich, daz er der selber gu^eter vogtrehtunge luhe den vorgenanden herron von Ruti ze rehtem erbelehen, vnd hat er o^vch daz getân vnd bestetet¹ nah miner bette mit aller redlichi, worten vnd werchen, mit brieve vnd insigel, swez su dar zů bedorften vnd inen notdurftig waz. Vnd wan ich miner swagron her Nicolaus² kilherren ze Kentzigen³ vnd ze Windesch⁴ vnd korherren ze Kostentz vnd her Johans von Fro^vwenvelt⁵ ritterz gebrůder in disem ko^vffe vnd in allen endelichen minen Sachen rât, gunst vnd willen sůche vnd begeren, so hant su dur minen nutz har inne geben ir rât, gunst vnd willen vnd mit mir den herren diz bestetet ze merer sicherhait mit ir baider ingesigeln. Vnd daz die vorgenanten herren von Ruti an disen gu^etron vnd rehtunge ich noch enhain min erbe har nah besweren an gerihte ald âne gerihte, so han ich vnd min swagre die vorgenanden inen ze ainer sicherhait vnd ze ainem gewerem vrkunde aller dirre getât, daz ez allez stet belibe bi vns^f) vnsren nahkomen ane allen krank, gegeben disen brief besigelt offenlich mit vnser drier ingesigeln. Diz beschach ze Werdegga, do man von gotez geburte zalte druzehen hundert jar, dar nah in dem zwai vnd zwainzegostem jare, an sant Laurencien abent, da ze gegen waren dise gezuge .. Wir Nicolaus kilcherre ze Kentzingen vnd ze Windesch vnd korherre ze Kostentz vnd Johans von Fro^vwenvelt ritter gebrůder veriehen allez dez, daz da vor geschriben stat, daz ez mit vnserm willen, gunst vnd rât besehenen^h) ist, vnd hân har über ze ainer stetunge vnd merer sicherhait vnd kraft den vorgendenⁱ⁾ herron dem abte vnd dem convent gegeben disen brief besigelt offenlich mit vnsren ingesigeln.

Source Fulltext: Chartularium Sangallense V, Nr. 3166, S. 438-439.