Allen, die disen brief sehent oder^a) lesen, kunde ich Růdolf Huni burger ze Rapprehtswile¹, daz ich mit bedachtem můte han || recht vnd redelich ze ko^vffen geben brůder Cůnrat schaffener des gotzhuses ze Bůbinkon² an des vorgenanden huses stat das gůt, || daz da heisset daz Hindergůt, daz gelegen ist ze Walde³, vur ledig eigen mit holtz mit velde mit wunnen mit weide mit akkern || mit wisen vnd mit aller der ehaffte, so dar zů ho^eret, vmbe sechs pfunt vnd vierzig pfunt Pfenningen Zurich geber muntze, die selben pfenninge ich von ime enpfangen han vnd bekeret in min noturft. Vnd ze einer ganzer Sicherheit dis ko^vffes so han ich ime das vorgenande gůt gevertigot vnd vf geben mit aller der Sicherheit Worten vnd werchen, so man en ledig eigen durch recht vertigen vnd vf geben sol, vnd han mich dar vmbe entzigen vnd enziche mich offenlich an disem briefe vür mich vnd min erben aller der ansprache vorderunge vnd rechtes geistelichs oder weltelichs, so ich oder min erben an das vorgenande gůt hatten oder iemer gewinnen mo^echten keinen weg. O^vch bin ich gebunden vnd binde min erben dar zů an disem briefe, daz wir daz vorgenande hus ze Bůbinkon vmbe daz vorgenande gůt nach rechte vur stan suln vur ein ledig eigen vnd vur antwurten ane alle geverde, swo sin daz vorgenande hus ze Bůbinkon bedarf. Vnd daz dis alles war si vnd stete belibe, dar vmbe so han ich gebetten den .. vogt vnd den .. rât der stat ze Rapprehtswile, daz si ir ingesigel geben an disen brief ze einem offen vrkunde der vorgescriben dingen, wan ich eigens ingesigels nicht enhan. Wir der .. vogt vnd der .. rat der stat ze Rapprehtswile wissen ein offen warheit der vorgescriben dingen, vnd dar vmbe so geben wir durch bette der vorgenanden luten vnser burger ingesigel an disen brief ze einem offen vrkunde der vorgescriben dingen. Dis beschach, da ze gegen waren her Johans luprester ze Turnten⁴, her V^olrich Sto^eri kilcherre ze Walde, her Herman pfrůnder ze Walde, Heinrich der Amman, Johans Gamlenstein der elter, Heinrich Marschalch, Heinrich Walpersperger⁵, Heinrich der Armo vnd Herman Hachel, vnd do man zalte von gottes geburte druzehen hundert jar, dar nach in dem zwei vnd zweinzigosten jare, an der nechsten mitwuchen vor sant Johans dult des Toffers.

Source Fulltext: Chartularium Sangallense V, Nr. 3161, S. 434-435.