Ich Johans von Eptingen¹, dem man sprichet Bvliant, ein ritter obman in der Sache vnd^a) der missehelli, || so her Johans vnd her Arnolt von Grv^enenberg² rittere gebrv^odere hant mit den bvrgeren von Basil³ vnd mit || namen mit dem spitale vnd mit des spitales phlegeren von Basil, mit hern Heinriche vor Gassen dem || Hagendorn einem rittere vnd mit den von Lene⁴ vmbe die vogteye vber sant Gallen gv^ot, daz in den dinghof ze Egringen⁵ ho^eret. Da sprich ich der vorgenant obman, daz mich reht dvnket vf min eit, den ich zen heiligen dar vmbe getan han, ist daz dv selben gv^oter, dar vmbe dv missehelli ist, ho^erent in den selben dinghof ze Egringen, daz||
si ze beiden siten in dem selben dinghove reht tv^on vnd liden svnt, alse des hoves reht vnd gewonheit stat, dvnket aber dewederen teil, daz die hv^ober vnd die hovelvte, die da dvr reht des selben hoves reht sprechen svnt vnd gesworn hant, niht gemeine vnd in^b) da niht fv^oget reht ze tv^ende noch ze lidende, so mag vnd sol der selbe teil, ob er wil, sin reht fvrbaz ziehen in den nechsten dinghof da bi, der des selben hoves genos si vnd da man si dvr reht hin wisen sol, vnd mvgent daz tv^on von einem hove zem andern vntze an den jvngesten, alse ez von alter har komen ist vnd sitte vnd gewonlich ist, dvrch daz ie dem man sin notdvrft vnd sin reht beschehe ane alle geverde. Daz mich diz alles reht dvnket vnd mich bessers niht verstan, dar nach alse mir geraten ist vnd ichs ervarn han an den witzigosten ritteren vnd bvrgeren in der stat ze Basil vnd vsserhalb im lande, vnd mich o^vch selbe reht dvnket vnd mich bessers niht verstan, daz sprich ich vf minen eit. Vnd ze einem waren vrkvnde diz dinges so han ich der vorgenant obman disen brief besigelt mit minem ingesigele. Dirre brief wart geben ze Basile des jars, do man zalte von gottes gebvrte drvzehen hvndert jar, dar nach in dem drv vnd zweinzigosten jare, an dem nechsten dv^onrstage vor dem palmtage.

Source Fulltext: Chartularium Sangallense V, Nr. 3181, S. 446-447.