Wir graue Johans von Habspurg¹ kunden allen, die disen brief sehent oder ho^erent lesen, das der erber || bescheinden^a) man Gerung von Kempten² vur uns kam ze Rappreswile³ in vnser stat vnd entzech sich || da offenlich mit bedachtem můte nach erber luten rât, die da zegegen waren, vnd gab vns vf || an vnser hant ledeklich an allen furtzug, als man ein recht lên durch recht vf geben sol, die vogteige ze Ringwile⁴, als hie mit namen gescriben stat, Kleggowes hofstat giltet sechs Schilling minr drier Pfenninge, anderhalb viertel habern vnd ein hůn, Krumbisens hofstat giltet sechs Schillinge minr eis pfennings, anderhalb viertel habern vnd ein hůn, des Roten hofstat giltet sechs Schillinge pfenninge, zwei viertel habern vnd ein hůn, Walawiles hofstat giltet sechs Schillinge minr funf Pfenninge, anderhalb viertel habern vnd ein hůn, des Kusters hofstat giltet sechs Schillinge minr drier pfenninge, anderhalb viertel habern vnd ein hůn, vnd Engelbrechtz^b) von Schowingen⁵ egerden geltent ein Schilling pfenninge, die vorgenanden hofstette vnd egerden er von vns ze rechtem len hatte, als vor gescriben stat, vnd vns von graven Růdolf seligem vnserm vatter⁶ vur recht eigen sint ankomen vnd vnser recht eigen waren, vnd nach disen dingen do gaben wir offenlich vnser rechtunge vnd mit namen die eigenschaft der vorgenanden gu^eter recht vnd redelich dem hûse ze Bůbinkon⁷ sant Johanses orden, das gelegen ist in Kostentzer bistům. O^vch vertegeten wir dem selben hûse die vorgenanden eigenschaft vnd rechtunge vnd gaben si^c) vf brůder Chůnrat schaffener⁸ an sin hant an des vorgenanden hûses stat, als recht ist, vnd mit aller eafti^a) vnd sicherheit worten vnd werchen, so man nach rechte vnd gewonheit der steten vnd des landes ze solicher vertegunge keinen weg tůn solte, vnd haben vns dar vmbe entzigen vnd entziechen vns offenlich an disem brief vur vns vnd vnser erben aller der ansprach vnd des rechtes, so wir nu hatten oder iemer gewinnen mo^echtin weder mit geistlichem noch mit weltlichem gerichte an dien vorgenanden gu^etern keinen weg. Vnd ze einer meren sicherheit der vorgenanden dingen do widerleit vns der vorgenande Gerung die eigenschaft der vorgenanden gu^eter mit dem gůte, das da heiset du hůbe in der Gassen vnd gelegen ist bi dem dorfe ze Kempten vnd iarlich giltet vier stuke vnd ein swin, das zehen Schillinge gelten sol, die selben hůbe er vns ledeklich vf gab an vnser hant, als man ein eigen gůt dur recht vf geben sol, vns vnd vnsern erben vur recht eigen ze hanne, vnd nach disen dingen do liehen wir dem vorgenande Gerunge die vorgenanden hůbe ze rechtem len, als recht ist. Vnd das dis alles war si vnd stete belibe, dar vmbe geben wir vnser ingesigel an disen brief ze einem offen vrkunde der vorgescriben dinge. Dis geschach ze Rappreswile, do man zalte von gottes geburte drutzehen hundert jar, dar nach in dem dritten vnd zwentzigosten jare an dem zinstag nach sant Hylarien tult, da^d) ze gegen waren her Hartman von Baldegge⁹, her Eberhart von Eppenstein¹⁰, her Egbrecht von Goldenberg¹¹ ritter vnd ander erber lute.

Source Fulltext: Chartularium Sangallense V, Nr. 3175, S. 443-444.