Allen den, die disen brief sehint odir hoerint lesin, kund ich Wilhelm von Gutingen¹, daz ich den || ersamen gaischlichen luten .. dem abbte vnd der samnung von Salmanswille² des ordins von Zitel || des bistums von Costintze hab gegebin luterlich dur got vnd dur min vnd miner vordem sele^a) willen || bi gesundem libe den zehinden ze Breginsdorf³, der ab dem houe gat, da Cu^eni der keller von Wernswiller⁴ vnd Bertolt von Mittilberg⁵ vffe sitzent, der min zinslehin ist von dem vorgenantin closter von Salmanswiller, der vier maltir vesan vnd vieriv habern giltet sant Galler messis, den siv hinnanfur niessin sont an alle Widerrede, vnd han dise gift getan vor dem ersamen herrin dem .. official von Costintz⁶, vor dem och mir gelobt ist von dem seibin abbte von Salmanswiller, daz mir nah miner begirde ain alter sol werdin gestift, da taeglich ain priester misse sprech an gevaerde vbir min vnd miner vordem sele hail, vnd ist och div gift also von mir geschehin, daz die von Salmanswiller jaerlich den zehinden mir bietin sont oder den, die vf dem houe sitzent, vmb div vorgenanten aht malter gůtis kornes, vnd wellin wir in habin, des son siv vns gunnen vor andern livten, wen wir des nit, so sont siv in gebin dem siv went^b) an alle widerede. Vnd daz disiv gift iemer me staete belibe, darumb so gib ich disen brief den vorgenanten von Salmanswiller besigiltin mit des vorgenantin .. officialis von Costintze, mins brůder hern V^olriches⁷ vnd minem insigeln. Dirre brief wart gebin, do man zallet von Cristes geburte drivzehinhundert jar vnd fivnf vnd zwaintzig, nah^c) sant Agathun tag an dem dunstag, da ze gegin was der Ruhe von Costintz, Cůnrat in der Bunde vnd der vorgenante .. abbt von Salmanswiller⁸, der keller, der reuinter, der von Walkilch⁹ mivnch des vorgenantin closters vnd ander ebner^d) livte. Wir der vorgenante .. official vergehin, daz disiv gift vor vns geschah, vnd henkln darumbe vnser insigel an disen brief dur bette baider tail. Ich och V^olrich von Gutingen gib min insigel an disen brief ze aim vrkunde dirre gift dur bet baider tail.

Source Fulltext: Chartularium Sangallense V, Nr. 3232, S. 479-480.