Venerabili fratri .. episcopo Constantiensi. Perduxit nuper ad nostri apostolatus auditum infeste relationis assertio, quod nobilis vir Diethelmus comes de Thogge(m)burg¹ et nonnulli alii earum partium excommunicationis et alias graves spirituales et temporales penas et sententias per Processus nostros contra Galeacium Marchum, Luchinum, Stephanum et Johannem de Vicecomitibus² et alios hereticos et rebelles sancte matris ecclesie partium Lombardieac fautores adiutores||
valitores et consiliatores eorum eisque quomodolibet adherentes dudum habitos promulgatas et inflictas in suarum animarum salutis dispendium incurrere seque illis involvere non timentes, contra dictam ecclesiam suosque fideles in dictorum hereticorum et rebellium subsidium presumunt ad easdem partes, sicut asseritur, se transferre Ludouico Bauarie duci³ excommunicato gravibus suis exigentibus culpis et excessibus nichilominus adherendo. Nos autem, eorum obviare periculis et animarum saluti prospicere super hiis paterne solicitudinis studiis cupientes, fraternitati tue per apostolica scripta committimus et mandamus, quatinus per te vel alium seu alios prefatum comitem et quosvis alios, quos premissa velle noveris attemptare, moneas efficaciter et inducas, ut ab eis omnino resiliant et desistant prefatis hereticis et rebellibus ac fautoribus adiutoribus consiliatoribus valitoribus et eis adherentibus quoquomodo seu dicto duci super hiis, que ad regimen et administrationem regni vel imperii Romani pertinent, nullatenus adherendo seu prestando per se vel alium seu alios publice vel occulte auxilium consilium aut favorem. Alioquin omnes et singulos tam clericos quam laycos cuiuscumque sint preminentie ordinis dignitatis conditionis et Status, etiam si pontificali vel quavis alia premineant dignitate, qui tuis monitionibus huiusmodi non parentes presumpserint contrarium attemptare, de quibus tibi summarie simpliciter et de piano ac sine strepitu iudicii et figura constiterit, in excommunicationis et alias penas et sententias processuum predictorum, quas dudum tibi in illis partibus publicandas misisse meminimus, incurrisse declares ipsosque facias excommunicatos et aliis predictis penis et sententiis contentis in eisdem processibus subiacere in ecclesiis et locis illarum partium, si quando et ubi expediens tibi videbitur sollempniter et publice nunciari, alias per spirituales et temporales penas et sententias, de quibus expedire cognoveris, contra ipsos et eorum singulos, qui non parendo tuis monitionibus huiusmodi contumaces extiterint, exigente iusticia processurus nobisque per tuas litteras, quicquid super premissis egeris, fideliter rescripturus. Datum Amnione kl. aprilis.

Source Fulltext: Chartularium Sangallense V, Nr. 3240, S. 485.