Dilecto filio nobili viro Hermanno de Landenberg. Ecce quod litteris tue nobilitatis receptis et contentis in eis plenius intellectis, super quibus tue diligentie Studium plurimum in domino commendamus, dilecto filio nobili viro Lipoldo duci Austrie et Styrie dirigimus preces nostras, ut nobilem virum Diethelmum comitem de Thoggemburg a suo dampnando proposito retrahere non postponat nec ipsum gentemque suam armigeram in subsidium hereticorum et rebellium per terras et dominia sua transire permittat, sed ei potius super hiis et aliis, sicut expedire viderit, se opponat, quodque subditos suos, si qui sint cum hereticis et rebellibus in partibus Lombardie, cogat et faciat recedere penitus ab eisdem, et insuper quod te recommendatum habens specialiter tibi et genti tue, cum qua in servicium dei et ecclesie suorumque fidelium profecturus existis, per terras et districtus suos velit conductum concedere ac favorem suum liberaliter exhibere. Ceterum, cum nobis scripseris, te posse habere centum homines in armis fideles, ydoneos et expertos tecum contra dictos hereticos et rebelles in Italiam profecturos, quod eos computatis in illis quinquaginta, de quibus tibi dederamus licentiam, habeas, placet nobis, sciturus, quod illos mandabimus ad stipendia recipi consueta. Datum Auinione kl. aprilis anno nono.

Source Fulltext: Chartularium Sangallense V, Nr. 3239, S. 484.