Allen den, die disen brief an sehent, lesent oder ho^errent lesen, kvnden wir Stephan vnd Johans Vo^eli vnd veriehen an disem brief fvr vns || vnd fvr alle vnser erben, daz wir den zehenden, den wir ko^vften ze rehtem lehen vmb die erba^eren lvte Gvnthers sa^elgen kind || von Winkla¹ vnd ja^erlich giltet ain malter vesan vnd ain malter haber vnd fvnf Schilling phenning vs dem hof ze Lanquat², gelvhen || haben vnd lihen iemer me den vro^vwen gemainlich in dem convent ze sant Gallen in der vorstat³ vmb ain hv^on ja^erliches geltes, vnd vergehen och offenlich an disem brief, ob die vorgenanten vro^vwen den vorgeschriben zehenden verko^vfen ald versezzen wolten, daz wir noch vnser erben sv dar an mit kainen dingen niemer svmen noch ieren son, si so^ellen da mit tv^on, alles daz in nôtvrftig ist. Vnd ze ainem waren vrkvnde aller der dinge, dv da vorgeschriben stand, so geben wir die vorgeschriben Stephan vnd Johans Vo^eli den vorgenanten vro^vwen disen brief mit vnseren insigeln besigelten. Dirre brief ward geben des jares, do man zalte von gottes geborte drvzehen hvndert jar, dar nah in dem fvnf vnd zwainzigosten jar, an sant Verenvn tag.

Source Fulltext: Chartularium Sangallense V, Nr. 3263, S. 503.