Wir Hiltpolt von gottes gnaden abt¹ des gotzhuses ze sant Gallen kvnden vnd veriehen allen den, die disen brief ansehent lesent oder ho^erent lesen, || daz wir an gesehen hant den vesten vnd den statten dienst, den vns vnd vnserm gotzhus die erbern herren her Arnolt vnd her Eberhart von Bůrglon² || gebrv^oder nvtzeklich vnd getrvlich tv^ond vnd getan hant vnd getv^on mugent, inen baiden vnverschaidelich hvndert march vnd fvnfzig march || silbers Costenzer gewiht lobent vnd gelopt habin vnd gebunden sint ze gen fur vns vnd fur vnser nachkomen. Vnd wan wir nv nvt enhaben an barem silber, das wir sv geweren mvgent der vorgenanten hvndert march vnd fvnfzig march silbers, so bewisen wir sv der fvnfzig march silbers vffen du phender ze Vttiswile³, du o^vch e irv phant waren von vns vnd von vnserm gotzhus⁴. Die vorgeschriben fvnfzig mark sont sv dar vf han mit dem, so si e darvffe hettin in phantz wis. Vnd vmb die vorgenanten hundert mark silbers so setzzen wir inen ze ainem staeten werenden phand zwainzig phunt phenning geltes Costenzer mvns, zehen phunt von den cinsen der phenning ze Appacelle⁵ vnd zehen phunt von den cinsen der phenning ze Huntwile⁶. Vnd habint inen dis sazzvng mit so^elicher beschaidenhait vnd mit so^elichem gedinge getan, als hie nach geschriben stat. Wir hand inen gelopt mit gv^oten trvwen vnd binden vnser nachkomen dar zv^o, daz selb ze tv^en, swenn dv kilch ze Marpach⁷, du von vns vnd von vnserm gotzhus lehin ist, die grave Kraft von Toggenburg hat⁸, zem nehsten ledig wirt, de wir si an alle widerred vnd furzug lihen svlent dem vor genanten hern Arnolt von Bvrglon ald V^olricen⁹ sinem brv^oder. Sv hant sich o^vch da wider des gebunden vnd sint des vergihtig worden, daz sv vnder dannan, so du kilch nut ledig ist worden noch gevallen, nvt niessen noch niessen went die zwainzig phunt phenning geltes, die wir inen versetzzet hant ze^a) Appacelle vnd ze Huntwile, wer o^vch, daz so du vorgenant kilch ledig wirt, das wir ald vnser nachkomen, da vor got si, inen ald ir ainem nut lihent ald nut gelihen mehtind, da von das si an vnsern tische erworben wer, oder von andren sachen, so sont sv denn irv phaender vnd die vorgenanten gult, die wir inen versetzzet hand, an heben ze niessen vnd fur sich an haben vnd niessen alle die wil, vnz daz wir ald vnser nachkomen an barem vnd an beraitem silber der selben hundert march vnd fvnfzig march^b) sibers^c) gewert werdent mit barem gv^ot, oder alle die wil, vnd daz wir ald vnser nachkomen inen zehen mark geltes layen geltz herren gult an ainem stuk ald an zwain stuken vnkrieges geltes reht vnd redlich verlihint oder gebent, vnd swenn wir inen fvnf march geltes lihint an ainem stuk, der sv nvt gebunden sint ze nemen wan an ainem stuk, so sol der phantschaz vnd der vrsatz halber ledig sin ze Appacelle oder ze Huntwille. Vnd ze ainem sichern vnd staeten vrkund der vorgeschriben warhait so henkent wir der vorgenant Hiltpolt von gottes gnaden abt des gotzhuses ze sant Gallen vnser insigel an disen brief mit dero vorgeschribnen hern Arnnoltz vnd hern Eberhartz von Burglon insigel. Wir die vorgenanten her Arnolt von Burglon kilchherre^d) Lucêrn¹⁰ vnd her Eberhart ritter gebrv^oder veriehen offenlich an disem brief, dc wir mit vnserm herren dem vorgenanten abt Hiltpolt von sant Gallen gesamnet vnd vberain komen sint aller der ding vnd geding, so hie vor geschriben stat. Vnd das dis alles staet vnd vnverwandlot blib, so henken wir o^vch baid vnser insigel an disen brief mit vnsers des vorgenanten herren abt Hiltpoltes insigel. Dc beschah ze sant Gallen in der stat vnd wart dirre brief gegeben, do man zalt von gottes geburt druzehen hundert iar vnd fvnfvndzwainzig jar, dar nach an dem naechsten svnnentag nah vnser vrowen tag ze mitte(m) o^vgsten.

Source Fulltext: Chartularium Sangallense V, Nr. 3262, S. 502-503.