Wir gra^vue Krafft von Togkemburg propst der kilchen Zurich¹ kunnden allen, die disen brieff sehent oder ho^erent lesen, das die erbern gaistlichen frowen die a^eptissin vnd aller der conuent der frowen des closters ze Maggeno^vw² des ordens von Cytels durch gott vnd durch vnnser bette Angnessen Mechthilt Spitzinen tochter empfangen hannd in ir conuent vnd ir pfrůnde vnd gemainsami als andern ir conuent swo^estern gegeben hannd in ir closter, vnd vmb die gu^ettlichi so ha^vnd wir die XX march sylbers Costentzer gewycht, der si vnns schuldig wa^vren vnd wir in verliehen hatten ze iren notturfften, verlaussen vnd haben sy inen gegeben vnd geben an disem brieffe, also dz wir nach^a) dehain vnnser erbe die selben XX march an si vnd ir closter niemer geuordren, won wir dz selbe gůtt in durch gott haben verlaussen vnnd durch vnnser vnd vnnsern vordren sele hails wyllen. Wir haben ouch den selben frowen der a^eptissin vnd dem conuennt von Maggenow vnd ir closter den hofe ze Nider Vtzwyl³, der vnnser aigen wz vnd wir koufften von V^olrichen dem Giel⁴, der funff mutt kernen zway malter haber vnd X ß. d. Costentzer pfening giltet, gegeben mit allen rechten ze aigen vnd geben an disem brieffe durch gott mit den gedingen, das sy die vier stuck, die si gebint schwo^ester Anastasyen von Luttenspurg⁵ von dem gůtt ze Gannderschwyl⁶, das da haysset der Schutzen gůtt, ze libgedinge, das selbe gůtt wir in ouch geben durch gott, das die selben vier stuck mit disen funff mutt kernen zway malter haber vnd die X ß. Costentzer pfening von Nider Vtzwyl der vorgenanten Anastasyen vnd Angnesen gemain sygin ze ainem libdinge vnuerschaidenlich vnd inen die vorgenamten die a^eptissin vnd der conuent gebunden sygin vnd ouch dz closter, die wyl sy baide lebent, oder ir aine, ob die ander stirbet, vsser ir kornhus ja^erlich ze gebende die vorgenamten XI stuck ze herbste ze sant Gallen tult vnd ouch dis^b) pfening on allen vszug, das si ir gewanndt da mitte besseren vnd ander ir nottdurfft, vnd wenne sy baid ersterbint, so so^ellint die vorgenamten die a^eptissin vnd der conuent, die dann lebent, die vorgeschribnen XI stuck vnd ouch die X ß. geben ir conuennt nach diser Ordnung. Des ersten dz sy gebent Petri et Pa^vli dem conuennt gemainlich dru stuk ze ainem diennste, ze sant Michels dult dru stuck dem conuent ze ainem diennste, Katherine dru stuck ze ainem diennste, Judoci zway stuck ze ainem diennste vnd dz ander Laurentzy ouch ze ainem diennste dem conuente, vnd sol man dise hochzytt sehen vnd herlich bega^vn vnnd vnnser mit namen demu^etteklich vnd flyssenklich gedencken in allem conuente. Aber hannd wir den vorgenamten frowen der a^eptissin vnd dem conuent gegeben durch gott vnd durch vnnser sele hails wyllen XX march gůttes sylbers Costentzer gewycht, das si da mitte in vnd ir closter hůben kouffen ouch mit den gedingen, das sy vnnser memorie begangen an sant Gallen tage, die wyl wir leben, mit anda^vcht vnd mit der collecte pretende, vnd dz sy von ir houe ewenklich geben ze Bůbental⁷ von ir kornhus VII stuck Wyler⁸ messes, des selben messes die vorgenamten XI stuk ouch so^ellint sin, vnd dz sy der selben VII stuk diu geben ze der selben vnnser memorie dem conuent gemainlich, die wyl wir leben, vnd ze vnnserm sybenden zway stuck vnd ze vnnserm dryssigosten ouch zway stuk, alles dem conuente ze diennsten, vnd nach vnnserm tode das sy die selben dru stuck geben ze vnnserm ja^vrzytt, als dz kome, vnd ze vnnserm sybenden zway vnd zem dryssigosten ouch zway, als vorgeschriben ist, vnnd dz sy zem ja^vrzytt zem sybenden vnd ouch zem dryssigosten vigilie lesen ze chore demu^etteklich vnd vnnser mit namen ernstlich gedencken, vnd so^ellen die vorgenamten frowen vnnser ze allen vorgeschribnen hochzytten ouch flissenklich gedencken vnd die hochzytt vnd diennste nit abe la^vn durch kainer schla^echte sache. Wa^ere aber, da uor gott sye, dz si den vorgeschribnen Anastasyen vnd Angnesen die selben XI stuck vnd die X ß. Costentzer nit ga^ebint elli ja^vr, die wyl sy baid oder aine lebt, oder nach ir baider tode die vorgeschriben hochzytt vnnd hynnethin vnnser memorie vnnsern sybenden vnd den dryssigosten vnd nach vnnsrem tode vnnser ja^vrzytt vnd ouch sybenden vnd dryssigosten nicht begiengen mit dem ampte mit der vigilie vnd mit diennste, welher zytt oder wie dick dz beschicht, so hannd wir den erberen heren dem conmenntur vnd dem conuent der heren von Tobein⁹ sant Johanns ordens, die dann lebent, den gewalt gegeben vnd geben ouch an disem brieffe, dz si vordren vnd innemen das korn, dz man ze dem diennste solte han gegeben, vnd dz in ir nutz bekeren vnd in ze gewunnen mit gerichte, als dick es versumet wirt, als vorgeschriben ist. Vnd dz dis wa^vr sye vnd sta^ett plibe vnd ze ainem offenn vrkunde alles des^c) vorgeschriben ist, so henngcken wir vnnser insigel an zwene glich briue, an die ouch die vorgenamten die a^eptissin vnd der conuent von Maggenowe vnd ouch der erber gaistlich herre der apt von Wettingen¹⁰, der des vorgenamten closters ze Maggeno^vwe pfleger ist, ir insigel henngcken so^ellen ze ainem vrkunde alles des vorgeschribnen offennlich. Wir schwo^ester Anna von Richenstain a^eptissin¹¹ vnd aller der conuent des closters ze Maggenowe Cyteler Ordens in Costentzer bistumb verjehent offennlich an disem brieff, das wir von dem erwirdigen heren gra^vuen Kraffte von Togkemburg probste der kilchen ze Zurich empfangen hannd ze vnnsern vnd vnnsers closters wegen des ersten XX march Silbers Costentzer gewycht, die er vnns vor verliehen hatte vnnd nun gegeben vnd gelaussen, vnd den hofe ze Nidern Vtzwyl, der VII stuck gyltet Wiler messes vnd X ß. Costentzer pfening, den er vnns ouch gegeben ha^vt durch got vnnd durch siner sele hails wyllen, vnd das wir dar vmbe gelopt hannd vnd loben an disem brieue fur vnns vnd vnnser nachkomen vnd vnnser closter, das wir die vorgenamten XI stuck vnd X ß. dn. von den selben gůttern der Schutzen gůtt ze Gannderschwyl vnd ze Nidern Vtzwyl, die er vnns geben ha^vt vnd geuertiget, ja^erlich ga^eben Anastasyinn vnd Angnesen vnnsern conuent swo^estern den vorgenamten vnuerschaidenlich, die wyl sy lebent vnd ir aine die ander vber lept, die wyl sy lebet alleklich, vnd dz wir nach ir beder tode mit den vorgenamten XI stucken vnd X ß d. die selben hochzytt tugentlich vnd erlich begangen mit der hochzytt vnd mit den diennsten, als vorgesetzet vnd geschriben ist. Ouch verjehent wir der XX marchen, die er vnns nun jungest haut gegeben gůttes silbers Costentzer gewycht durch gott, dz wir hůben damitte ko^vffen vnd dz wir dar vmbe von vnnserm hofe zů Bůbental ja^erlich geben von vnnserm kornhus VII stuck, der man dru sol geben ze siner memorie, die wyl er lebt, ze sant Gallen tag ze ainem diennste, vnd nach sinem tode ze dem ja^vrzytte, als es vallet, vnd ze dem sybenden zway stuck vnd ze dem dryssigosten zway ze diennsten dem conuente gemaine, vnd dz wir die memorie beganngen, die wyl er lept, mit sybenden vnd dryssigosten vnd mit den diennsten vnd nach sinem tode mit jarzytte sybenden vnd dryssigosten mit vigilien in dem chore vnd mit den diennsten mit ganntzer demůtt vnd dar nach alles dz behalten, das da vorgeschriben ist, mit gůtten truwen, vnd haben vnns vnnd vnnser closter vnd vnnser nachkomen dar zů gebunden vnd binden an disem brieffe offennlich, vnd ouch die gesetzte, wa^ere dz wir dz vorgenamte korn vnd pfening nit ga^ebint den vorgeschnbnen swo^estern oder ir ainer, die wil si lept, oder die diennste nicht richtint dem conuent oder^d) nicht begiengen, dz wir bega^vn so^ellen, tugenlich vnd erlich, als vorgeschriben ist, das danne die herren von Tob ein vordren vnd ingewunnen, das danne versumet, als dicke dz beschicht, vnd dz wir dis alles sta^ette haben mit gůtten truwen vnd vollfu^eren, so henngcken wir vnnser insigel an zwen glich brieue offennliche vnnd bitten ouch den erbern gaistlichen herren vnnsern heren den apt von Wettingen, der vnnser pfleger ist, das er sin insigel dar an henngcke ze ainem vrkunde des vorgeschribnen offennliche. Dis beschach ze Zurich nach der gepurt Cristi M° CCC° XXV jare, da nach ze mittem mayen, do indictio wz die VIII. Wir apt Hainrich des closters ze Wettingen¹² sant Bernhartz ordens pfleger des closters vnd der frowen ze Maggeno^vw verjehent an disem brieue, das alles, dz da vorgeschriben ist, mit vnnserm gunst beschechen, vnd won es dem vorgenamten closter ze Maggenowe nutzbar ist vnd gotte loblich vnd den selen trostlich, so henngcken wir vnnser insigel an dise zwen gliche brieue ze ainer besta^ettunng alles des vorgeschribnen, in dem ja^vr vnd an dem tage, als vorgeschriben ist.

Source Fulltext: Chartularium Sangallense V, Nr. 3247, S. 490-492.