Wir Hiltpolt von gotes genaden apt des gotzhus von sant Gallen kunden vnd vergiehen allen den, die disen brief sehent lesent || oder ho^erent, das fur vns kamen her V^olr. von Guthingen ritter vnd frv^o Margareta sin elich wirten vnd sie baidu mit vnser || hant, willen vnd gunst hant gevo^egt vnd gemachet den hof ze Ro^etziswile^a) vnd den hof an der Egge, die muli ze Hagenwile^a), || die schůpv^oz, da Růdolf der Muller vf sitzet, vnd die rutinan, die in den Nidern Aichen ligent, vnd die rutinan in alt Ruti Willehl. von Guthingen¹ des vor genemten hern V^olr. von Guthingen brůder, vnd sint du vor geschriben go^eter aellu burglehen zv^o der burg ze Hagenwile^a), vnd wenne wir ald vnser nachkomen wellen ald mugen, so sulen wir du vor genemten go^eter wider koffen, als^b) die brief kundent vnd sagent, die von vnsers gotzhus wegen dar vber geben vnd geschriben sint². Wir apt Hiltpolt da vor genemt vergiehen och, das der selbe her V^olr. von Guthingen vnd frv^o Margareta sin elich wirten hant gevo^egt vnd gemachet mit vnser hant, willen vnd gunst Willehl. von Guthingen da vor genemt die zwen wingarten, die man da haisset die Geren, die gelegen sint vnd^c) der burg ze Grimmenstain, die recht lehen sint von vns vnd vnserm gotzhus, mit allem dem, so dar zv^o geho^eret, vnd ist diz gemaechte alles beschenen, als recht, sit vnd gewonlich was von recht ald von gewonhait. Vnd das diz alles war sige vnd staete belibe, dar vmbe so geben wir apt Hiltplt. da vor genemt disen brief besigelt mit vnserm insigel. Wir her V^olrich von Guthingen vnd frv^o Margareta sin elich wirten da vor geschriben vergiehen ain gantz warhait aller der vor geschriben dinge. Vnd ze ainer merer sicherhait dar vmbe so henken wir baidu vnsru insigel an disen brief. Diz beschach vnd wart dirre brief geben ze sant Gallen an dem naechsten zinstag vor sant Vrbans^d) tag, do man zalt von gotz geburte druzehen hundert jar, dar nach in dem funften vnd zwainzegosten jar.

Source Fulltext: Chartularium Sangallense V, Nr. 3248, S. 493.