Wir Hiltpolt von gotes genaden apt¹ des gotzhus von sant Gallen kunden vnd vergiehen allen den, die disen brief sehent lesent oder || ho^erent, das fur vnd kamen her V^olr. von Guthingen ritter vnd Willehl. von Guthingen² sin brůder vnd in vnser hant vns vf gabent || siben phunt vnd acht schilling geltes gaeber Costentzer phenninge vs dem hof ze Můlach³, das ir recht burglehen was vnd ge||ho^eret ze der burg ze Hagenwil^a)4, du och burglehen ist, vnd baten vns baide vlisseclich, das wir inen baiden vnd ouch frv^o Margareten⁵ des vor genemten hern V^ol. von Guthingen elich wirten lihen ze rechtem burg lehen du vor geschriben siben phunt vnd acht schillinge, das wir och durch ir baider bete getan haben vnd mit disem brief lihen vnd gelihen haben hern V^olrich von Guthingen, frv^o Margareten siner elichen wirten, Willehl. von Guthingen sinem brůder gemainlich ze rechtem burglehen du vor geschriben siben phunt vnd acht schillinge vs dem hof ze Můlach, wenne och wir ald vnser nachkomen mugen ald wellen wider koffen das vor geschriben burglehen, das sulen wir tv^on, als die brief⁶ kundent vnd sagent, die von vnsers gotzhus wegen geben vnd geschriben sint vber die burg ze Hagenwil.^a) vnd vber du go^eter, du burglehen sint ze der selben burg ze Hagenwil.^a) Vnd das diz war sige vnd staete belibe, dar vmbe so geben wir apt Hiltplt.^b) dar vor genemt disen brief besigelt mit vnserm insigel. Diz beschach vnd wart dirre brief geben ze sant Gallen, an dem zinstag nach sant Vrbans tag, do man zalt von gotes geburte druzehen hundert jar, dar nach in dem funften vnd zwainzegosten jar.

Source Fulltext: Chartularium Sangallense V, Nr. 3251, S. 495.