Allen den, die disen brieff an sehent lesen oder ho^erent lesen, kúnd ich her Johanns von Lutterberg¹ rytter vnd vergich offennlich an disem brieue fúr mich vnd fúr alle min erben, das ich den hofe ze Sytterdorff², den man da spricht Múßings hofe, den ich ko^vfft vmb den Ka^eser, han ze kouffen geben huß vnd hofe vnd holtz vnd veld vnd alles, dz dar zů ho^eret, mit allen rechten der ersamen frowen schwo^ester Margarethen der a^eptissinen vnd dem conuent gemainlich ze Maggenow³ vmb XLVI lib. d. Costentzer múntz, der ich von inen gar vnd ganntzlich gewert bin vnd in minen nutz komen sind, vnd han inen den selben hoffe ze kouffen geben da fúr, dz ich in vertgen sol fúr recht aigen, vnd han ouch dz geta^vn vnd sol ouch des vorgenanten hofes nach recht ir wer sin. Vnd dz diß alles wa^vr sig vnnd sta^ett belibe, dar vmb gib ich der vorgenant her Johanns der vorgeschribnen schwo^ester Margarethen vnd dem conuent disen brieff besigelten mit minem aignen insigel ze ainem wa^vren vrkúnd vnd ze ainer sta^etten sicherhait aller der vorgeschribnen ding. Diß geschach vnd ward dirre brieff geben ze sant Gallen nach der gepurt Cristi M° CCC° vnd im XXVII ja^vr an dem na^echsten zinßtag vor sant Philip vnd sant Jacobs tag.

Source Fulltext: Chartularium Sangallense VI, Nr. 3309, S. 8.