Dilecto filio Henrico nato quondam Friderici comitis de Toggemburg¹ canonico Constanciensi^a) salutem. Ad illorum provisionem dexteram apostolice liberalitatis libenter extendimus, quibus nobilitas generis vite ac morum honestas et alia dona virtutum dicuntur laudabiliter suffragari. Sane petitio pro parte tua nobis exhibita continebat, quod dudum super defectu natalium, quem pateris de soluto genitus et soluta, quod huiusmodi non obstante defectu^b) posses ad omnes ordines promoveri et ecclesiasticum beneficium obtinere, etiam si curam haberet animarum, tecum extitit auctoritate apostolica dispensatum, quodque post dispensationem huiusmodi parrochialem ecclesiam in Helfenswile² Constanciensis^a) diocesis tibi in minoribus ordinibus constituto canonice collatam recepisti eamque per decem annos et amplius pacifice tenuisti et adhuc tenes ad sacros ordines non promotus, fructus redditus et proventus medio tempore percipiens ex eadem. Igitur supplicato nobis pro parte tua, ut cum eandem ecclesiam esses libere resignare paratus, ne propter premissa vel aliquod premissorum dampno ledereris infamie vel inhabilitatis valeas labe notari, dignaremur tibi super hoc de oportuno remedio providere, nos huiusmodi supplicationibus inclinati, ne propter predicta vel aliquod predictorum dampno ledereris infamie, omnem inhabilitatis maculam sive notam, quam pretextu premissorum contraxeras, auctoritate apostolica duximus abolendam, ita quod premissorum occasione nullum tibi in iudicio vel extra iudicium impedimentum sive preiudicium afferri valeat vel obstaculum interponi, tibi nichilominus omnes fructus redditus et proventus, quos ex dicta ecclesia minus debite perceperas, remisimus et donavimus de gratia speciali, volentes, ut dictam ecclesiam parrochialem realiter omnino dimitteres, prout in nostris litteris super hiis confectis plenius continetur³. Nos igitur volentes tibi meritorum tuorum intuitu, super quibus apud nos fidedignorum testimonio commendaris, gratiam facere ampliorem, canonicatum ecclesie Constanciensis^a) cum plenitudine iuris canonici apostolica tibi auctoritate conferimus et de illo etiam providemus, prebendam vero, si qua in dicta ecclesia vacat ad presens, vel proximo vacaturam, quam per te vel procuratorem tuum ad hoc specialiter constitutum infra unius mensis spacium, postquam tibi vel eidem procuratori de illius vacatione constiterit, duxeris acceptandam, conferendam tibi post acceptationem huiusmodi cum omnibus iuribus et pertinentiis suis donationi apostolice reservamus, districtius inhibentes venerabili fratri nostro . . episcopo et dilectis filiis capitulo Constancien(sibus)^a) seu illi vel illis, ad quem vel ad quos in eadem ecclesia prebendarum collatio provisio seu quevis alia dispositio communiter vel divisim pertinet, ne de illa interim etiam ante acceptationem huiusmodi nisi postquam eis constiterit, quod tu vel procurator predictus illam nolueritis acceptare, disponere quoquomodo presumant, ac decernentes ex nunc irritum et inane, si secus super hiis a quoquam quavis auctoritate scienter vel ignoranter contigerit attemptari, non obstantibus de certo canonicorum numero et quibuslibet aliis eiusdem ecclesie statutis et consuetudinibus contrariis iuramento confirmatione sedis apostolice seu quacumque firmitate alia roboratis, aut si aliqui apostolica vel alia quavis auctoritate in eadem ecclesia in canonicos sint recepti vel ut recipiantur insistant, seu si super provisionibus sibi faciendis de canonicatibus et prebendis in dicta ecclesia speciales vel de beneficiis ecclesiasticis in illis partibus generales nostras vel predecessorum nostrorum Romanorum pontificum aut legatorum eiusdem sedis litteras impetrarint, etiam si per eas ad inhibitionem reservationem et decretum vel aliter quomodolibet sit processum, quibus omnibus preterquam auctoritate nostra in ecclesia ipsa receptis vel prebendas expectantibus in eadem te in ipsius prebende assecutione volumus anteferri, sed nullum per hoc eis quo ad assecutionem aliorum prebendarum et beneficiorum preiudicium generari, seu si eisdem episcopo et capitulo vel quibusvis aliis communiter vel divisim ab eadem sit sede indultum, quod ad receptionem vel provisionem alicuius minime teneantur et ad id compelli non possint, quodque de canonicatibus et prebendis ipsius ecclesie aliisque beneficiis ecclesiasticis ad eorum collationem provisionem seu quamvis aliam dispositionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem, et qualibet alia dicte sedis indulgentia generali vel speciali, cuiuscumque tenoris existat, per quam presentibus non expressam vel totaliter non insertam effectus huiusmodi nostre gratie impediri valeat quomodolibet vel differri, et de qua cuiusque toto tenore habenda sit in nostris litteris mentio specialis, aut si presens non fueris ad prestandum de observandis statutis et consuetudinibus ipsius ecclesie solitum iuramentum, dummodo in absentia tua per procuratorem ydoneum et, cum ad ecclesiam ipsam accesseris, corporaliter illud prestes, seu quod pateris defectum natalium, ut prefertur, de soluto genitus et soluta, tecum insuper, ut dictos canonicatum et prebendam libere recipere et ipsos^c), postquam fueris assecutus, licite retinere valeas, predicto defectu et aliis premissis et qualibet alia constitutione in contrarium edita nequaquam obstantibus auctoritate apostolica de speciali dono gratie dispensamus. Nulli ergo etc. nostre collationis provisionis reservationis inhibitionis constitutionis et dispensationis infringere etc. Dat. Auinione, XIII. kl. februarii, anno undecimo.||
§ In eundem modum dilectis filiis . . abbati monasterii in Ruti⁴ et . . thesaurario⁵ ac . . cantori ecclesie Thuricensis⁶ Constanciensis^a) diocesis salutem. Ad illorum provisionem dexteram etc. usque duximus dispensandum. Quocirca mandamus, quatinus vos vel duo aut unus vestrum per vos vel alium seu alios eundem Henricum vel procuratorem suum eius nomine exnunc in dicta ecclesia auctoritate nostra recipi facientes in canonicum et in fratrem, stallo sibi in choro et loco in capitulo cum plenitudine iuris canonici assignatis, huiusmodi prebendam per nos, ut premittitur, in eadem ecclesia reservatam, si tempore huiusmodi reservationis nostre in dicta ecclesia vacabat vel extunc vacavit, aut quamprimum illam inibi vacare contigerit, prefato Henrico vel procuratori predicto pro eo post acceptationem huiusmodi cum omnibus iuribus et pertinentiis suis auctoritate predicta conferre et assignare curetis, inducentes ipsum vel dictum procuratorem pro eo in corporalem possessionem huiusmodi prebende ac iurium et pertinenciarum^d) eius et defendentes inductum sibique facientes de ipsorum canonicatus et prebende fructibus redditibus proventibus iuribus et obventionibus universis integre responsuri, non obstantibus omnibus supradictis, seu si eisdem episcopo et capitulo vel quibusvis aliis communiter vel divisim ab eadem sit sede indultum, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Contradictores auctoritate nostra etc. Dat. ut supra.

Source Fulltext: Chartularium Sangallense VI, Nr. 3303, S. 3-5.