Dilecto filio Henrico nato quondam Frederici comitis de Toggemburg acolito Constantiensis diocesis salutem. Personam tuam apud^a) nos de probitatis meritis fidedignorum testimonio commendatam sincera prosequentes in domino caritate, illa tibi libenter concedimus, que tui saluti et statui fore credimus oportuna. Sane petitio pro parte tua nobis exhibita continebat, quod dudum super defectu natalium, quem^b) pateris de soluto genitus et soluta, quod huiusmodi non obstante defectum^c) posses ad omnes ordines promoveri et ecclesiasticum beneficium obtinere, etiam si curam animarum haberet^d), tecum extitit auctoritate apostolica dispensatum, quodque post dispensationem huiusmodi parrochialem ecclesiam in Helfenswile Constantiensis diocesis tibi in minoribus ordinibus constituto canonice collatam recepisti eamque per decem annos et amplius pacifice tenuisti et adhuc tenes ad sacros ordines non promotus, fructus redditus et proventus medio tempore percipiens ex eadem. Quare pro parte tua fuit nobis humiliter supplicatum, ut cum eandem ecclesiam sis libere resignare paratus, ne propter premissa vel aliquod premissorum dampno ledaris infamie vel inhabilitatis valeas labe notari, providere tibi super hoc de oportuno remedio misericorditer dignaremur. Nos igitur volentes te predictorum meritorum tuorum obtentu specialis prosequi prerogativa favoris, tuis supplicationibus inclinati, ne propter predicta vel aliquod predictorum dampno ledaris infamie, omnem inhabilitatis maculam sive notam, quam^e) premissorum pretextu vel occasione contraxisti, auctoritate apostolica abolemus, ita quod premissorum occasione nullum tibi in iudicio vel extra iudicium impedimentum seu preiudicium aferri^f) valeat vel obstaculum interponi, tibi nichilominus omnes fructus redditus et proventus, quos in eadem ecclesia minus debite precepisti^g), de speciali gratia remittimus et donamus. Volumus autem, ut dictam parrochialem ecclesiam realiter omnino dimittas. Nulli ergo etc.^h), nostre dispensationis abolitionis remissionis donationis et voluntatis infringere etc. Dat. Auinione, XIII. kl. febr. anno undecimo.

Source Fulltext: Chartularium Sangallense VI, Nr. 3304, S. 6.