Dilectis filiis . . in Wertingen¹ et in^a) Ruti² monasteriorum abbatibus ac . . plebano plebis Thuricensis^b)3 Constanciensis diocesis salutem^c). Cupientibus vitam ducere regularem apostolicum debet adesse presidium, ut eorum pium propositum possint ad laudem divini nominis adimplere. Cum itaque dilectus filius Jacobus natus dilecti filii Amoris de Luterberg⁴ militis Scolaris Constanciensis diocesis cupiat, sicut accepimus, una cum dilectis filiis . . abbate et conventu monasterii sancti Johannis siti in valle vulgariter nuncupata Johannertal⁵ ordinis sancti Benedicti dicte diocesis in eodem monasterio sub regulari habitu virtutum domino famulari, nos volentes ipsum in huiusmodi suo laudabili proposito confovere, discretioni vestre per apostolica scripta mandamus, quatinus vos vel duo aut unus vestrum eundem Jacobum, postquam clericali fuerit caractere insignitus, si sit ydoneus et aliud sibi canonicum non obsistat, auctoritate nostra recipi faciatis per vos vel alium seu alios in eodem monasterio in monachum et in fratrem ac iuxta ipsius monasterii consuetudinem sibi regularem habitum exhiberi ac de communibus^d) ipsius monasterii proventibus sicut uni ex aliis prefati monasterii monachis provideri ipsumque sincera ibidem in domino caritate tractari, non obstantibus quibuscumque statutis et consuetudinibus monasterii et ordinis predictorum contrariis iuramento confirmatione sedis apostolice seu quacumque^e) firmitate alia roboratis, seu si pro aliis scripta ibidem apostolica sint directa aut si eisdem abbati et conventui vel quibusvis aliis communiter^d) vel divisim ab eadem sit sede indultum, quod ad receptionem vel provisionem alicuius minime teneantur et ad id compelli aut quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem, et qualibet alia dicte sedis indulgentia generali vel speciali, cuiuscumque^e) tenoris existat, per quam presentibus non expressam vel totaliter non insertam effectus earum impediri valeat quomodolibet vel differri, et de qua cuiusque toto tenore habenda sit in nostris litteris mentio specialis. Contradictores per censuram ecclesiasticam etc. Dat. Auinione, XIII. kl. februarii anno undecimo.