Dicto legato^a)1. Tam gratuito suadente quam grato devotionis affectu, quem dilectus filius nobilis V^olr Fredericus comes de Toggenburg² ad sanctam Romanam ecclesiam se habere pretendit signanter nostram presenciam adiens multipliciter commendandus in domino ipsi ecclesie serviturus, ordinatum est inter nos ex parte una et eum ex altera, quod si ipse cum quinquaginta equitibus infra octavam vel quindenam pasche primo futuri ad tardius ad partes Lombardie in servicium ipsius ecclesie venerit, recipiantur predicti equites ad stipendia nostra et illa ipsis prout aliis stipendiariis nostris militantibus in eisdem partibus exsolvantur, prefato quoque nobili sicut aliis capitaneis stipendiariorum huiusmodi de stipendiis et aliis congrue debeat provideri computato tempore servicii seu solutionis eorum ab octo diebus inmediate precedentibus diem, quo ipsi equis et armis decenter muniti tibi se duxerint presentandos. Igitur discretionem tuam rogamus et hortamur attente tibi nichilominus iniungentes, quatinus cum geramus merito placidum, quod predictus nobilis tractetur iuxta sui decenciam honoranter et contrarium nobis quamplurimum displiceret, sic ipsum una cum comitiva eiusdem servata ordinatione huiusmodi recommendatum propensius habeas, quod ex sui tractatione decenti successive forcius animetur et gaudeat se susceptis instare serviciis tuque fili propterea dignis in domino laudibus commenderis. Dat. Auinione, X. kl. februarii, anno undecimo.

Source Fulltext: Chartularium Sangallense VI, Nr. 3306, S. 7.