Allen den, die disen gegenwurtigen brieff sehent alder ho^erent lesen, kunde ich Amor von Horwe[n]^a)1 schulthais dze Wile² vnnd vergihe des offennlich [an]^a) disem brieff, das ich willeclich vnd mit gůtter v[orbe]trachtunge^a) in kouffs wiß empfangen hab von [dem]^a) beschaiden manne Bartholomen Goldast [bur]g[er ze]^a) Costenntz zwelff pfunt pfennig Costenntzer muntz, der ich von im gar gewert bin vnd in minen redlichen nutz kommen vnnd bekert sind, vnd das ich im vnd sinen erben vmb die selben pfennige red^b) vnd redlich ze kouffend hab geben ainen mutt nuß gelts vß dem gůte, das Burckarts Vnderschopfe ist aines burgers ze Costentz, das Cůnrat der Stoltz da buwet, vnnd zwen mut nusse gelts vß Hainrichs des Laitzers vnd vß Vlrichs des Laitzers gu^ettern³, die vom bistumb ze Costenntz lehen⁴ sind, vnd han im ouch das selb gelt vffgeben vnd geuertiget, als ich von recht soll, nach gewonhait vnnd nach recht des lands, vnd verzihe mich darüber fur mich vnnd min erben aller ansprach aller vordrung vnnd alles des rechtens, so ich daran hatte ald von dhainen dingen gehaben mo^echte. Ich sol ouch des vorgenanten Bartholomens vnd siner erben recht wern sin nacht^c) recht on alle geuerde vor gericht vnd one gericht gaistlichem vnnd weltlichem vnnd an allen stetten, da es in nottdurftig ist. Vnnd ze ainem vrkunde der warhait vnnd ze ainer stetten sicherhait aller der dinge gib ich der vorbenempt Amor von Horwen min insigel an disen brieff. Der ist zů Costenntz geben, do man von Cristus geburt zalt drüzehen hundert jar, dar nach in dem sibenundzwaintzigisten jar, an sannt Johanns tag des to^effers.

Source Fulltext: Chartularium Sangallense VI, Nr. 3317, S. 16.