Wir Rudolf von gottes genaden bischof ze Costentz vnd graf V^olrich von Montfort gebrůder tu^egen kunt allen den, die disen brief ansehent, lesint oder ho^erent lesin, || das wir vns baide gemanlich vnd ietweder besunder gebunden habent vnd binden an disem gegenw|rtigen brief, gescha^ehe das der pfantschatz der gu^eter ze Bernhartzcelle, || ze Morshv^obe, Helfetswille, Rikenbach, Batzenhaid, Adorf, ze A^elggo^e, des zehenden ze Moggewille, ze Bramshouen, ze dem Wille vnd des zehenden ze Zv^otzwille mit || anderen lv´ten vnd gu^etern an vns oder an vnser wederen geuiele nah tode oder bi lebende der edelen vnseren lieben swester fro^v Adelhait von Griessenberch, den pfantschatz dv´ selbe vnser swester sid ir wirtes sa^eligen tode hern Hainrichs von Griessenberch nússet vnd inne hat von dem gotzhus ze sant Gallen, das wir denne des gůtes, dar vmb dv´ selben gv^eter vnd der pfantschatz hievor dem vorbenemten hern Hainrich von Griessenberch versetzet wrdent, lassent vnd lan so^elent hundert march silbers Costenzer gewihtes, wenn ain herre oder der . . conuent von sant Gallen von vns den pfantschatz lo^esen vnd ledegon wil, vnd so^elen och ainem . . herren oder dem . . conuent von sant Gallen den pfantschatz halben geben ze lo^esende, wenn wir des gůtes ze dem halbentail gewert werden, den si danne nah der losung ze dem halbentail niessen sont, ane alle vnser vnd vnser . . erben widerrede. Vnd ze ainem waren vnd sta^eten vrkúnde aller der ding vnd gedinge, so hie vor gescriben sint, han wir vnserv´ insigel gehenket an disen brief. Der wart geben ze Arbon¹ in dem jare, do man zalte von gottes gebúrte drúzehenhundert jar, siben vnd zwainzig jar, an dem nahsten donstag nah sant Gallen tag.

Source Fulltext: Chartularium Sangallense VI, Nr. 3330, S. 24.